今日約咗網友乙君去渋谷探路兼睇場地.傻魚早少少去到周圍行下睇下嘢,到咁上下夠鍾就去會合網友乙君.等等下有位"咖哩王子"埋身搭訕...傻魚冇理佢,但係佢就不停同傻魚講嘢...等人呀?有冇時間呀?男朋友?嚇到傻魚即刻打畀網友乙君.可惜網友乙君唔接電話,咁傻魚唯有打畀網友太太.講完個電話都仲唔見網友乙君喎...而嗰位"咖哩王子"見傻魚講完電話,又想搭訕...好在呢個時候網友乙君打o黎話到咗唔見傻魚,即刻過去搵網友乙君呀!唔通傻魚近排食得咖哩多?唔理喇...乍乍林同網友乙君去探路睇下場地.
渋谷呢個位永遠都係咁多人.將近聖誕節,多咗啲燈飾.行咗一陣就到咗個目的地喇.
間嘢啱晒要求呀!搵埋個店長傾埋啲價錢,餐單,跟手落埋訂.了咗件心事,安樂晒~跟手喺度食埋個晚餐.
脆卜卜,熱辣辣,好熱氣但好味.呢味係後加o架...之前仲食咗個沙嗲雞串同海鮮濕炒米.個沙嗲雞串好好味,好正~海鮮濕炒米都唔錯.掛住講同食,都唔記得要影相添.食完諗住行下竹下通,途中見到間舖幾得意...
間舖啲衫係一樽樽咁賣,啲掛喺度o既衫個牌有埋間舖o既平面圖,話畀啲客知件衫個樽喺邊...下次得閒再去睇過.行完竹下通,就搭電車去新宿買禮物.同網友乙君喺間舖度左揀右揀,揀咗好耐至揀到心水禮物.畀錢嗰陣個店員問係唔係送禮用.傻魚答係.跟住又問要用禮物紙包定係用膠袋.傻魚話要禮物紙.網友乙君就話,連禮物紙都可以慳返,唔錯喎...之後個店員又問需唔需要多個紙袋要o黎分開載住啲禮物送畀人.傻魚咁"平"精,梗係話要喇...話返畀網友乙君知,網友乙君係咁笑呀...間舖好熱,所以買完嘢就即刻去搵個地方飲嘢.
傻魚嗌咗杯芒果汁,唔好飲...一時唔記得日本啲芒果係唔好食o既...傾下笑下又夠鍾散會喇!傻魚途經歌舞伎町行返傻家嗰陣,有個阿叔拎住個"鴨店餐牌"行埋o黎問傻魚...吓?!!條街行咗咁多年,從來都冇試過...諗返起個"咖哩王子",斷估都唔係因為傻魚索喇~唔通...傻魚額頭有行字"要人陪"?寂寞有樣睇?!!好驚呀!!!
沒有留言:
發佈留言