尋日出街鎖門嗰陣見到屋主喺傻家個門鎖度貼咗張紙.張紙係通知傻馬同傻魚以後啲垃圾要轉地方擺.一路而o黎都係擺喺人哋屋企側邊,可能近排啲烏鴉又多返,成日摷到成地都係垃圾,人哋掃到忟啩...經過之前擺垃圾嗰度,見到貼咗張紙寫住:自己o既垃圾唔該擺返自己門口.哈~屋主老婆實係畀人話完o黎喇...由聽日開始,啲垃圾要擺喺入口個鐵閘出面個水渠蓋上面.仲好~行少十幾步...
今日原本諗住去睇紅葉.點知尋晚睇電視,氣象預測呢兩日會落雨,所以就取消咗喇.日本啲氣象預測一向都幾準,話有雨通常細細哋都會落幾滴.點知今日除咗天陰陰,氣溫得幾度之外,一滴雨都冇...正話睇電視新聞個氣象預測話今日同聽日都冇雨...啫係點呀?搞到傻魚今日成日留咗喺傻家等睇雨...聽日仲信唔信佢好?睇睇下紅葉落雨咪弊?!!都係帶埋把縮骨穩陣...
食埋聽晚嗰餐,又要去買餸喇...上次入o既貨,食咗兩個星期呀!!!勁呀~
沒有留言:
發佈留言