羽田空港

今日係新o既東京羽田空港國際線航空站開始啟用o既大日子!傻魚非常之開心.第一班到達o既航機係由香港飛o黎o架!唔知邊位咁榮幸第一個踏足呢個新機場呢?!
以前每次來回成田空港,差唔多兩個鍾o既電車程都搞到傻魚又頭暈又頭痛.所以傻魚好憎去成田空港.自從"阿娜"同埋"揸佬"推出咗每日一班o既羽田航機,傻魚就甚少再去成田空港...除咗同傻馬一齊返香港...因為,始終成田會有平啲o既航線.雖然羽田嗰兩班機啲時間有啲辛苦,由香港返東京要通頂,但係傻魚都係好樂意去搭.主要原因係電車程只需一個鍾.
舊o既羽田國際航空站好簡陋,得一個細細o既登記大堂,細細o既出入境處同埋細細o既行李提取處.冇任行購物店舖,連便利店都冇.次次去到攞完登機證都唔知去邊好,有次仲搭架接駁巴士去返第二航空站搵食同買嘢.關生去過一次之後話太悶,以後唔會再用.
新o既羽田空港國際線航空站就唔同喇~設備整全之餘,仲有好多好食好玩好睇好買o既新蒲點.傻魚好期待下一次返香港,到時一定要好好去"參觀"下至得.不過喺品川駅搭京急本線去廿分緟都唔使,可能會忍唔住先去"實地考察"一番.呵呵!

宜家暫時得幾家航空公司提供去香港,北京,上海虹橋同韓國金浦.遲啲會有更多o既航線去更多唔同國家.亦有幾家提供"廉價機"o既航空公司已經同羽田簽約.相信羽田會搶去成田唔少生意.
除咗可以搭電車去羽田空港國際線航空站,仲可以搭單軌電車同巴士去.搭單軌o既話仲方便,一出閘就係出國登記櫃檯.由浜松町駅只需十四分鍾,超級方便.如需轉國內線,可以搭免費接駁巴士.
相信羽田空港國際線航空站會成為近期o既熱門蒲點.睇o黎傻魚都要搵日去湊下熱鬧喇~
資料:
羽田空港國際線航空站
京急本線機場線
單軌-東京モノレール