紅葉之旅在長野(一)麦草峠 白駒の池

到咗秋天,又係一連串o既賞紅葉旅程.咁啱有三連休,可以去遠啲.九月頭已經問緊傻馬去邊好,搞到前日至終於決定.尋日臨時臨急上網定埋酒店,買埋特急電車飛.

今朝神咁早起程去新宿轉特急到茅野.今日架電車因為中途慢駛,所以遲咗半個鍾至到達.結果冇時間去酒店擺低啲行李,要用三百円擺儲物櫃.巴士都因為電車遲到而遲開.

一個鍾後,巴士由海拔七百四十米上到二千一百二十七米.

去到仲要行三十分鍾山路至到達第一個目的地.

傻魚開始有高山症,心跳加速,呼吸困難,心肺痛...

落雨濕濕,山路又難行,幾驚會中途暈低呀.

人哋就用三十分鍾,傻魚就用咗差唔多成個鍾至去到白駒の池.

去到已經斷氣咁滯...

停咗一陣雨,又開始落返...

今次傻馬喺出發前冇講明會上山,所以傻魚着得好"輕便".

氣溫得十五度,開始覺得凍,個肚仔又餓...都係去搵食醫肚先~

傻馬叫咗個山菜烏冬.啲山菜同平時喺其他地方食o既好唔同,裡面有西洋菜...

傻魚叫咗個山菜天麩羅飯.

成棵菜就咁炸...幾好味,但食起上o黎有少少難度...

仲有塊葉...右邊粒苦o架!!!

食飽啲雨仲未停.聽聞聽日啲雨會仲大...點算?

原本仲想行埋另一邊,但係要出返去再行個半鍾.唔夠時間,唯有快步行返出去搭巴士返茅野.拎返啲行李,去到酒店拎完房之後休息咗一陣,又行去駅附近搵食.

呢間海鮮居酒屋叫福福屋,同白木屋,笑笑係同一個集團o既...

自成一角,氣氛好好...

傻魚叫咗杯咸焦糖酒溝奶,好好飲!!!

芝士燒蛋

燒魚餅

呢個集團係炸雞軟骨o既鼻祖,所以必叫!

鰯刺身

鹽燒大蔥雞串,露荀雞翼串,好味~

炸雞翼,好味~
食飽去便利買定啲早餐返酒店,今晚要早啲瞓至得.好攰呀!!!