分飛宴

台風迫近,慶幸冇狂風暴雨...不過就落咗成日雨...落雨天好好瞓,死唔願離開張床...結果攤咗成個鍾至起身,搞到遲咗出門口...

遲咗十分鍾到達...等咗十五分鍾都仲未見其他人同主人家...唔通去錯地方等?正在胡思亂想之際,終於見到主人家靚仔爸同埋網友紅茶驅車現身.再等多一陣,等埋網友初春,囝囝同網友新媽一齊去今日o既目的地.去到見到網友媽咪一家已經到咗.
原本係諗住燒嘢食...因為落雨,所以改為室內大食會.叫完外賣之後,啲小朋友已經急不及待開始打機.

網友紅茶個細仔好搞笑...係都要坐住網友媽咪老公對脾打機.個個就笑話網友媽咪老公係頭等位好舒服,所以細仔黐住唔肯走.
靚仔有好多玩具,好大方咁拎晒出o黎畀大家玩...等咗一陣啲外賣到咗之後,傻魚太興奮唔記得叫傻馬影相...失敗...有好多嘢食...有薄餅,炸薯粒,炸雞,寿司...

靚仔爸仲親手整咗好味千層麵.另外網友紅茶仲帶咗糯米飯o黎畀大家食...

今日聚會o既主旨係因為有網友會離開関東,所以搞咗個切餅加開香檳儀式.食飽飲醉之後...

就梗係o黎個港式小玩意,砌下四方牆喇...之後影埋大合照,今日個分飛宴就散會喇...
網友新媽,同你識咗冇幾耐,啱啱開始熟絡(傻魚啲認親認戚病又發作喇...),你又話要搬走喇...下次唔知幾時至可以再見.希望你搬到去新地方之後生活愉快,事事如意.
網友媽咪,傻魚成日亂講嘢,希望冇激親你.遲啲仲會見到你,所以傻魚唔同你講再會住...等你返東京再傾過喇~
網友靚仔媽,今日打搞晒.傻魚乜都幫唔到手,真係唔好意思...遲啲等天氣好返再搞燒嘢食,好嗎?

燒肉

今朝起身個頭冇咁痛,可能因為尋晚都算係瞓到啩...原本約咗網友媽咪同小朋友去行街,可惜天公不做美落雨喎...咁就改地點喇...好在出門嗰陣停咗雨.一齊食晏之後行咗一陣,然後上去網友媽咪度滾搞.小朋友見有人同佢玩,連晏覺都唔瞓,發揮好客小精神,不斷拎啲玩具同傻魚玩...梗係喇...難得有人同佢玩喎...小朋友玩到不斷哈哈笑,傻魚就乘機消耗小朋友啲電,希望小朋友今晚可以一覺瞓天光.好耐都冇玩得咁開心,出咗一身汗都幾舒服.同網友媽咪傾下偈,同小朋友玩下睇下電視,話咁快就六點鍾.陪小朋友食完嘢之後傻魚就走喇.網友媽咪,兩手空空上去搞咗你大半日,希望冇左住你喇.下次有機會傻魚想再上去玩.
行去車站途中,諗諗下今晚都係唔好煮...即刻打畀傻馬話不如出街食.難得傻魚開聲話出街食喎,傻馬梗係開心到飛起喇...傻魚返到傻家放低啲嘢等埋傻馬返o黎,然後一齊去傻家附近食...出門口嗰陣又開始落雨...好在唔係行好遠啫...

今次去牛角食燒肉放題,廿五樣嘢任食,二千六百円一位.

一人一塊大紙圍巾,咁啲油就唔會彈到件衫...

啲紙圍巾有幾款唔同o既圖案,好有心思...

第一碟唔使嗌,自動自覺送o黎...

坐咗個冇爐位o既座位,所以侍應之後擺咗個燒紅咗炭o既爐喺度...

呢個椰菜勁甜...一人食咗一碗...

呢個雞...都幾好...

燒到硬硬地啲肥油冇晒至食,正~

呢個雞全靠個明太子蛋黃醬...之後返兜多一碟...

普通喇...

個帶子仔好味...叫咗兩兜...
雖然啲料唔係最靚,但係都算唔錯.遲啲都會返兜...食完成身都係燒肉味,一返到傻家即刻走去沖涼...聽日去另一位網友度,又燒嘢食...好期待聽日,可以見到好多網友...
註: 牛角網站 http://www.gyukaku.ne.jp/index1.html

天呀~

天呀~幾時至會放過傻魚呀?係唔係傻魚做錯啲乜,要咁樣懲罰傻魚...個頭已經痛咗一日一夜,痛到尋晚完全瞓唔到...好辛苦呀!!!

快靚正o既一餐...半個鍾就有飯食...啲湯...傻魚飲咗一啖...好苦呀!!!結果迫傻馬飲晒成碗.聽日約咗網友媽咪同小朋友食晏.好耐冇見佢哋喇...希望今晚瞓到喇...瞓醒個頭就唔痛o架喇...

狂瞓

尋晚臨瞓前同傻馬一齊睇咗套電影,結果刺激得滯搞到兩條友都瞓唔著...整下呢樣,搞下嗰樣,成兩點幾至瞓到,一瞓就瞓到今朝十一點幾.好耐都冇試過瞓咁耐...不過瞓醒都係吽下吽下咁...可能瞓得多得滯啩...
今日諗住出去行下,但係見到出面咁"光"...都係咪搞,留喺傻家做御宅族算喇...煲下劇,睇下雜誌,幾咁悠閒呀...個雪櫃又仲未清完,唔使去買餸...諗起奶奶買啲湯包,求其摷咗包出o黎煲...

得閒得滯,整色整水搞咗煲雜菜鍋...太大煲,所以用碟上一半...個清肝明目湯...好苦!!!好在得一包咋...傻魚飲咗四份一碗就放棄,畀晒傻馬飲...聽日仲有一大碗添o架...
氣象局預測聽日會落雨...唔...不過傻魚要出街行下...家務...留返後日至做喇...哈哈~

失眠

尋日曬親搞到偏頭痛,結果尋晚完全瞓唔到.成晚眼光光做乜好?煲劇囉...一煲就煲到今日中午點幾鍾,終於筋疲力盡暈鬼咗兩個幾鍾...瞓醒成個人都仲係吽吽哋,今日要做o既嘢全部推去聽日...
冇乜精神,無謂搞咁多嘢...傻馬之前話想飲粟米湯...

即沖咗杯畀傻馬,自己就飲磨菇湯...個水菜原本諗住懶,就咁生食.但係傻馬又話要灼熟o黎食...搞到個賣相差晒...不過加埋芝麻醬又幾好食...今晚,要早啲瞓至得...

中暑

今日見冇乜事咪出街行下,順便買下嘢囉.點知條街鬼死咁熱...喺條街度行咗都唔夠五分鍾,已經濕晒身咁滯...搭電車去到新宿喺啲百貨公司買咗幾樣嘢,行咗一陣睇下書,咁就過咗兩個幾鍾...之後見冇乜太陽,咪行去超市買餸囉...行行下個太陽伯伯見傻魚咁耐冇見光,又走出o黎同傻魚打招呼...嘩...真係...唔該晒呀...已經搵啲陰啲o既地方o黎行,但係行咗一陣,突然眼前黑一黑...好在冇喺條街度暈咗咋...即刻搵間便利店涼下,然後繼續快步行去超市.去到超市個頭已經痛到爆咁滯,仲邊有心機買餸呀...是旦求其買咗一堆返傻家,之後執嗰陣至發現又買得太多,入爆咗個雪櫃...
抖咗一陣個人仲好熱...可能係中暑...不斷出汗,身體裡面啲熱散極都散唔到.個頭痛到爆,食咗特効止痛藥都冇用...本來諗住沖個凍水涼,但係啲感冒未清,啱啱至好返少少,費時又病過...唯有坐喺度乜都唔做,抹下汗囉...坐咗成個鍾,又好似好好多喇喎...
傻馬打o黎話會去新宿買完書至返,不過應該好快...咁傻魚咪慢慢煮囉...一時唔記得炒芽菜之前要費時搞搞啲芽菜,結果餐飯煮咗成個鍾...最烏龍o既係,傻魚以為有煲湯,所以煮咗兩個餸...但係其實嗰煲唔係湯,係...

炆雞...三餸冇湯,白飯冇得再裝...咁多餸梗係食唔晒喇!留返個炒蛋畀傻魚聽日午餐送白粥...個頭仲痛,今晚唔知幾點至瞓到...唉~

重出江湖

已經有一段時間冇出巡,今日見冇乜嘢做就四周圍睇下寫低啲魚鱗...傻魚錯過咗好多精彩o既嘢,以後會密啲出巡o架喇~
今日場兩落到大概兩點鍾至停,傻馬自己一個驅車去新宿睇祭.傻魚...見周圍濕漉漉,又啱啱好返啲,費時又病多兩錢重.留咗喺傻家無所事事,見間屋多塵,吸下囉.之後傻馬話不如去食寿司喎...都好!又唔煮...結果喺傻家附近間天下寿司醫肚.價錢可以接受,啲料就普通不過不失.都係新宿嗰兩間好啲.
同場加映:
病咗咁耐,都唔記得將之前出遊嗰陣買o既嘢啲相擺上o黎...

之前出遊買o既零食...係開咗個圓筒一人試咗兩包,同埋請蝸牛小姐食咗兩包...其他掂都未掂過...

喺水族館,傻馬見到話好得意,所以買咗兩個...結果咪又係擺咗喺個櫃裏面...

都係喺水族館買o既...都係擺咗喺個櫃裏面...

豁出去

呢兩日都咳少咗...隻特効藥係得o既.今朝傻馬去考試,傻魚繼續瞓.氣象局預測,下午會落雨.咁今日唔出街喇...近排晚晚都搞到傻馬冇得瞓,今日就補返算瞓餐飽囉.傻馬考完試去打咗陣波子機,羸咗萬幾円返o黎,成日就係咁瞓瞓瞓.都不知幾開心呀~場雨冇停過,仲落緊...今晚實好好瞓啫~

終於忍唔住,死就死喇!傻魚豁咗出去,今餐開始殺雞!!!食咗半煲,聽晚嗰半煲應該好入味好正.聽朝都仲落雨,傻馬好似話要出街喎...
後記: 其實每晚都有寫網誌,不過寫完就冇精神上相...搞搞下就堆咗一堆網誌喺草稿箱度...實在太多相喇...唯有叫傻馬幫傻魚上載喇...終於清晒啲草稿喇...好嘢~

大餐

傻魚見天氣開始轉熱,所以尋晚就收起啲羽絨被.諗住摷返張冷氣被出o黎,點知搵咗成晚都搵唔到...間屋有幾大啫...點會唔見o架...結果就用住毛巾被先...
今朝起身,好似冇咳得咁勁喇喎...收到網友甲君話問上野啲電車o既時間...咁啱傻魚又想去上野喎...其實想咗好耐,但係要自己一個人去又梗係提唔起勁...好喇...有個藉口話陪網友甲君去上野,順便去買嘢...呵呵~
去上野仲有乜買呀?咪又係大餃子同埋...海鮮...刺身...傻馬話好耐冇刺身食喎...

傻馬提定要o既魚子...傻魚唔食o既...

呢餐飯係咪好"勁"呢...魚子二百五十円,鰹魚四百三十円,大拖羅五百円,大餃子四百五十円,鰻魚二百五十円...餐飯食咗...一千八百八十円...仲唔係大餐?!!
後記: 啲冷氣被畀傻魚塞咗喺啲舊床舖度...諗咗好耐都唔係好明,點解傻魚會擺喺嗰度...算!!!至緊要搵返有得用...

入貨

呢幾日朝朝瞓到五點幾六點就會咳醒,仲嘈醒埋傻馬...真係好過意唔去.傻馬日日返工咁辛苦,仲要畀傻魚搞到冇得瞓...真係慘...呢幾日都好攰,今日終於可以休息下.見間屋成個星期冇執過...聽日先喇...轉咗特効藥,希望快啲好返喇.喉嚨已經唔痛,但係就好鬼痕...可以係啲痰...頑痰呀頑痰,你幾時至捨得走呀?
食完藥瞓咗一陣,好似好返好多喎...搵埋網友甲君一齊去買餸先...網友甲君話唔使買餸,但係要拎啲嘢擺喺傻家個雪櫃...咁呀...煲落煲湯整埋啲嘢就去企鵝仔邊買邊等網友甲君.傻魚知網友甲君仲有啲嘢要做,所以買完就散會.傻魚自己驅車去超市入貨.望住啲雞...唉...死就死喇...最多今晚唔食住,留返聽晚至食囉...

之前買咗磚豆腐,過咗一日期...都仲食得o既...傻馬鍾意多汁撈飯,麻婆豆腐就至啱傻馬.個湯...因為走咗出街買餸冇睇火,乾咗少少...唔怕!濃啲飲少啲囉...一樣啫...飯後傻馬有蜜瓜同埋...

呢個就係肥仔朋友喺大阪買畀傻魚o既手信.肥仔朋友話見好多人排隊買喎...呢個芝士蛋糕又真係幾掂喎...多謝肥仔朋友~

再會了

今朝又流鼻血...好在流咗唔係好多啫...可能唔夠瞓...因為尋晚肥仔朋友話九點半會拎啲行李上o黎傻家.咁傻魚咪八點幾起身囉...都知肥仔朋友唔會起到身,但係都怕萬一o架嘛...結果肥仔朋友十點幾至起身,o黎到傻家都十一點幾差唔多十二點.先出去買車飛,順便食個晏.原本諗住搵埋網友甲君一齊食晏,但係打咗幾次都冇人聽...食完晏去學校搞埋啲手尾,跟住返傻家拎行李...見仲有時間,肥仔朋友就再執下啲行李.傻魚就切咗半個蜜瓜畀肥仔朋友食.
啲靚仔真係唔知個驚字點寫...傻魚話冇乜時間,要快手啲...見肥仔朋友咁多行李,傻魚都幫手拎啲.但係肥仔朋友都仲係慢慢o黎.可能係傻魚心急啩...但係傻魚又唔想畀壓力肥仔朋友.你知喇...有時越趕就越亂,越亂就越慢.去到新宿站個月台,仲有三分鍾...真係好險...心臟差啲都會嚇死...送完肥仔朋友上車,傻魚喺新宿行咗一陣至返傻家.之後瞓咗一陣,然後收到網友甲君o既電話問傻魚去唔去買餸.傻魚真係好攰,所以推咗網友甲君.

今晚冇力煮飯,再加上傻馬成日話想食麵...求其整個番茄雜菜湯意粉.近排真係好求其...病係咁o架喇...

呢個就係前日同肥仔朋友一齊買o既蜜瓜...淨返半個,切咗一半畀傻馬食.傻魚食咗一啖就咳到死,都係少食唯妙...諗住食車李子會好啲,點知食完都係狂咳...唉...
後記: 其實今日有網友喺東京站搞募捐籌款畀四川災民.傻魚都好想去.奈何傻魚實在太攰同埋暈暈地,再加上冇聲,所以最終都係放棄咗唔去.傻魚已經叫朋友喺香港幫傻魚捐款o架喇...一陣上網再捐多次先...

肥仔朋友的送別會

一早起身都仲係咳得好勁...幾時至會好返呀?今日約咗肥仔朋友去原宿同渋谷.都估到肥仔朋友唔會咁早起身,所以約網友甲君兩點半喺車站等.行去車站途中經過一百円店,醒起要買啲嘢,驚之後唔記得,所以買咗先...去到車站遲咗少少,網友甲君已經企咗喺度...咦?唔見肥仔朋友喎...會唔會又香港時間呀?(肥仔朋友個錶係香港時間)傻魚唔知肥仔朋友今次住邊間民宿添...正想打電話去肥仔朋友個香港手提,就見到肥仔朋友蒲頭喇...原來係臨出門口肚痛,走咗去炸塔...
去到原宿,帶咗肥仔朋友同網友甲君去買飾物.個個都有收穫,除咗傻魚...傻魚唔好呢啲嘢...之後好肚餓,走咗去食烏冬...食完行咗一陣裏原宿,跟住就行去渋谷.去到渋谷做猿人,肥仔朋友大出血...之後去東京手,陪網友甲君買完嘢就搭車返歸.傻魚帶肥仔朋友去企鵝仔買個大袋,然後返傻家就執下嘢,拆下箱睇下有幾多嘢要肥仔朋友拎返香港.
傻馬返到o黎冇幾耐,肥仔朋友就拎住一大袋行李o黎傻家.執咗一輪嘢就出去海鮮居酒屋食嘢.

呢個蛋裏面係椰菜同豬肉.好味~

番茄煙肉薄餅,正...

呢個係每次o黎親都必叫o既豆腐.中間夾住腸仔片同蛋片,面頭係焗芝士...好味到暈...

呢個魚餅唔錯...

呢個喬麥麵,正係正在可以自己磨山葵.肥仔朋友磨得好鬼開心.今次好搞笑,o黎海鮮居酒屋竟然唔食海鮮...食完打畀網友甲君,去二次會.點知落到樓下肥仔朋友話要去幫朋友買啲成日用品...約咗網友甲君同日本人o架嘛...但係傻魚又唔想趕肥仔朋友,結果遲咗好多至去到...

食串燒...隔離坐咗一對男女,見傻魚幾個係咁講英文,臨走前用英文同肥仔朋友搭訕,仲請肥仔朋友飲啤酒.哈~肥仔朋友好得戚咁話:「生得靚仔唔係錯...」傻魚同網友甲君都費時應肥仔朋友.好開心咁傾到人哋收舖至走.今日好似食咗好多嘢咁...但係串燒傻魚係一串都冇食,凈係飲咗兩杯啤酒...驚熱氣,都係飲鬼佬涼茶算喇...嘻~

烚下烚下

今日好似好返啲冇咁辛苦.轉咗隻藥果然係好啲.食多日睇下使唔使食特効先...今日肥仔朋友喺大阪返東京.網友甲君打o黎問食唔食晏,傻魚話食.跟住就收到肥仔朋友個電話...咁啱...等埋肥仔朋友o黎傻家擺低個芝士蛋糕,跟住一齊上咗去學校問啲嘢,然後去搵網友甲君一齊食晏.肥仔朋友真係好鬼搞笑.傻魚因為病唔可以食雞,但係肥仔朋友就叫咗碟雞意粉.本來都冇乜嘢...講起香港啲燒味,肥仔朋友話啲雞都幾有"燒味"味...頂...
傾傾下醒起要去打機...乍乍林埋單起行.經過百果園,肥仔朋友見到啲生果串,忍唔住買咗串紅肉蜜瓜食.當然,又點會少咗傻魚嗰份呀...食完奶嘢...即刻咳到甩肺...跟住經過藥房,肥仔朋友話要幫人買嘢.買完突然叫傻魚同網友甲君慢慢睇下嘢先,肥仔朋友行返轉頭買多串蜜瓜食...咁都得...網友甲君同肥仔朋友打完機,就行去買餸.去到超市,網友甲君買餸,而傻魚同肥仔朋友就買生果.買咗個蜜瓜,一盒草莓同一盒車李子.買完散會...網友甲君返屋企煮飯仔,肥仔朋友返民宿沖個涼,而傻魚就返傻家等肥仔朋友同傻馬.
今晚唔使煮,出去新宿食しゃぶしゃぶ放題.

就係之前同關生去食過嗰間.上次諗住帶太子女去食,點知遇啱間舖裝修...仲諗住佢執咗添...

放題有四款湯底可以揀,今次叫咗清湯.佢個芝麻醬真係好掂.另外仲有柚子醋可任君選擇.除咗澳洲和牛可以任食,國內千葉產豬肉同菇菜豆腐都係任食.最重要係好味之餘,價錢仲唔貴.位位一千八百九十円,限時九十分鍾.
有興趣o既朋友,可以喺呢度 http://www.gnavi.co.jp/nabezo/ 搵間就近o既試下喇.

死瞓

今日傻馬原本係要帶傻魚去台場睇車...但係傻魚實在太病喇...結果傻魚就留喺傻家休息,而傻馬就自己一個去.今日個展係復古車展,其實之前都睇完類似o既...傻馬睇咗個幾鍾就睇完.之後傻馬見隔離有個設計展,走咗入去睇.又幾有趣喎...傻馬拎咗好多靈感返o黎同傻魚傾咗好耐...
傻魚喺傻家就食完藥瞓,瞓醒又食藥...再咁落去都唔係辦法,轉另一種藥食完都係咁o既話聽日就要去睇醫生...傻魚最憎就係去醫院...

今晚都係求其煮...好在傻馬對食從來都冇乜要求...唉...又夠鍾食藥喇...

入口車展

天一光就開始咳到頭痛,咳咗好耐都咳唔到嚿痰出o黎...勁辛苦.之後食咗片麵包然後食藥.會唔會係啲藥唔得呢...搞咗輪,終於冇咁咳...傻馬今日帶咗傻魚去海浜幕張睇車...係...冇錯...又係車...今次係入口車展.喺門口買飛嗰陣,無端端有個阿叔走埋o黎同傻馬講咗句嘢,然後畀張嘢傻馬...原來係個阿叔多咗張招待劵,所以益傻馬.好嘢!!!可以慳返二千円.

好立體下...

改車?!!

細細架...

迷你...

型...

好型...

呢隻色唔錯...

有兩個鼻孔...

好多正軨...

香車美女...

名車...

得意...

今次車展啲車就好得...不過啲姐姐唔多得...

嘩~異形呀!!!

和風...

細細架都搞飛門...

唔...

好可愛...

裏面係咁o架...

紅牛車...

迷你跑車...

個燈罩會唔會自動開o架?

使唔使咁多燈呀?

一個字...型!

個門o既設計好得意...

呢個軨簡單得o黎都幾鬼型...

乜色都有...

咁都得?!!

唔係畫落去o架...

係用水晶黐o架...

好大架車...

入口車,個軚唔同位...

嘩~唔記得乜戯架車係咁o架...

一套?!!
其實傻魚一入場冇幾耐就開始覺頭暈...行咗一陣就搵地方坐下,然後食少少嘢食藥.之後行咗一陣,都係唔多掂...結果就坐低抖,而傻馬就自己一個行.行到咁上下傻馬搵返傻魚,然後返傻家.搭車嗰陣,傻魚咳到半死...返到傻家得返半條人命...傻馬話煮麵畀傻魚食,點知最後又係傻魚整畀傻馬食...吹漲...