豬腩肉

今朝好忙...一起身即刻洗咗機衫,因為聽日開始一連兩日露台要做防漏檢查,用唔到...跟住啲電話就係咁o黎...都唔知係咪約埋o架...休息咗成個鍾,又要出去喇...約咗蝸牛小姐同毛毛大佬食下午茶.由於毛毛大佬好忙,淨係見得嗰一個鍾都冇...不過都好開心.之後蝸牛小姐就自己去行街,而傻魚就返傻家抖下.
返到傻家一開信箱,有人送嘢o黎摸門釘喎...打返個電話叫佢再送o黎,等咗兩個幾鍾至收到.原來係演唱會飛...見時候都唔早,送咗個短訊畀蝸牛小姐問幾點會到傻家.蝸牛小姐回覆話先去醫肚,然後至上傻家上網.今晚食乜?梗係好嘢喇...

呢間嘢成日經過都見個門口排滿人...之前同傻馬食過一次,正~

係一間食豬o既專門店.

必叫o既燒豬腩肉...好好味!

見到咁多肥膏,以為一定會好肥膩...其實係燒o既過程中,已經流走好多"豬油",所以一啲都唔覺膩.燒到嚿肉金黃色,正!叫咗個石頭燒飯,唔記得影...

呢個海鮮鍋,辣辣地,好味...下面有好多大豆芽菜...眼闊肚窄,結果食唔晒.呢餐兩條友食咗六千七百五十円.少少貴,不過唔緊要...因為喺香港食唔到.食完都成十點鍾,乍乍林返傻家上咗一陣網,蝸牛小姐又要趕返民宿喇...
有興趣o既朋友,上 http://www.tonchang.com/main.htm 睇下喇...全日本得七間分店,全部喺東京.