鯨吞

今日肥仔朋友搭夜巴士去大阪.三點鍾肥仔朋友上咗傻家擺低啲行李畀傻魚保管一個星期,然後一齊去原宿行下.肥仔朋友前幾日收到伯友o既"援助金",有錢喺身就身痕...去到原宿食咗少少嘢,肥仔朋友就開始佢個洗錢大計...買咗袋畀自己之後,又走咗去另一間舖買多個袋送畀女友.喺肥你朋友心大心細o既時候,傻魚梗係魔鬼上身喇...有隻魔鬼喺身邊,又點會買唔到嘢啫...
買完嘢之後傻魚就返傻家等傻馬,而肥仔朋支就返民宿執埋啲嘢,然後喺新宿會合一齊食飯...點知傻馬打o黎話個客搞大食會,所以食咗嘢,叫傻魚同肥仔朋友兩個去食飯喎...咁都得?!!是旦喇...等肥仔朋友搞掂啲嘢,o黎到新宿都八點九喇...兩條友施施然行去食咖哩...啱啱擺咗啖咖哩入口,肥仔朋友就問:
肥仔朋友:「咦?我搭幾點巴士o架?」
傻魚:「吓?你自己唔記o架...九點半喇嘛...」
肥仔朋友:「乜唔係十點咩?依家都已經係九點喇喎...」(狂摷張車飛)
傻魚:「係喎...弊!」
肥仔朋友:「(終於摷到張車飛)係喎...九點半喎...趕唔趕得切呢?」
傻魚:「應該得.行過去十分鍾倒...」
跟住兩條友係咁鯨吞碟咖哩飯...肥仔朋友嗰碟仲要係加大...(汗)九點三終於食完埋完單,快步由西口行返過去南口,去到巴士站九點廿五分.好在趕得切,鬆咗口氣...之後送埋肥仔朋友上車(費時佢上錯車),然後行返傻家,順便買包奶.由於食得好趕,傻魚冇食晒啲飯.返到傻家,傻魚驚傻馬夜啲會肚餓,煲咗煲粥.十一點鍾傻馬食咗一碗粥,傻魚食咗半碗,順便食藥.尋日流咗兩滴血,今日冇流...冇流咪唔使睇醫生囉...不過喉嚨好痛,仲失聲添...希望今日以毒攻毒,聽日可以好返啲...