今日點幾鍾收到蝸牛小姐個短訊,話想o黎傻家上網.約咗四點鍾,諗住去駅接蝸牛小姐...點知蝸牛小姐自己行咗去傻家,咁傻魚唯有快步行返傻家.一邊嘆茶一邊傾偈一邊上網,好快就過咗三個幾鍾.蝸牛小姐上網搞完啲正經嘢之後就同傻魚一齊起程去搵食.傻馬今日咁啱約咗同事食飯,所以冇同行.之前帶過蝸牛小姐去食完呢間拉麵店,蝸牛小姐激讚.所以今次返兜...邊間?
咪一蘭囉...今次都係去返池袋嗰間.入去喺門口買咗飛仔之後...
有個板顯示邊個位係吉o既...
裏面啲位係咁...所以就算一個女仔去食都唔怕畀人望住晒.
每個位都會有呢張紙,填完按鍾交畀店員,店員就會根據每個客人個人o既要求去準備碗拉麵...
唔識填o既話門口有指引教人點填,不過係日文...張嘢填乜?湯要淡,普通或濃味...湯o既稀"傑"度...加唔加蒜茸,加幾多...要唔要蔥,白定青...要唔要叉燒...要唔要秘製辣醬,加幾多...麵o既軟硬度...湯,得一款豬骨湯.但係可以有唔同變化,變成唔同口味...唔錯...
呢度o既半生熟蛋,必食!!!
交完張紙仔同飛仔,店員會先畀個半生熟蛋...(要加錢另叫)個蛋會跟張紙仔教埋人點剝蛋殼.
啲筷子個紙袋,其實係加料紙.所以坐低前唔記得叫蛋,或食到一半想加麵都唔使行返出去買飛仔.喺個筷子紙袋度圈完交畀店員,然後即場畀錢就得喇...碗麵冇影...因為傻魚走蔥,唔靚咪唔影囉...咁耐冇食啲味都仲可以保持到,真係好掂.想試下o既朋友,可以喺 http://www.ichiran.co.jp/index.html 搵間就腳o既試下喇~佢有條片諗住放上o黎畀大家睇,但係放唔到...唔緊要,可以喺個網頁度睇.
食完又去行地下街...行咗入一間舖見到件衫幾靚,跟住蝸牛小姐就試着上身.傻魚梗係又魔鬼上身,不停叫蝸牛小姐買.之後蝸牛小姐喺同一件舖睇中幾對鞋,試過覺得好好着...結果搞到人哋收唔到舖...蝸牛小姐又要擺低銀兩拎走兩件衫五對鞋...一路行出舖,啲員工喺咁講多謝...梗係...臨收舖做單咁大單o既生意,遲少少收都低喇...仲諗住行一陣去食好味蛋糕...買到忘晒型,買完就各自各返歸喇...聽日約咗毛毛大佬食下午茶...毛毛大佬同蝸牛小姐都好耐冇見,一定有排傾...好期待...呵呵~
沒有留言:
發佈留言