泰國節

今朝起身見冇乜事,諗住去睇恐龍.落雨天最啱室內活動.點知臨出門口又開始流鼻血,好在流咗少少啫...傻馬見傻魚咁樣,就話不如唔好去咁遠,近近地去原宿睇泰國節算喇...都好...去到...仲落緊雨,濕濕...

成街人都擔住把遮撞o黎撞去,寸步難行...

入口附近有啲表演...

泰國節九成都係食物攤位...有賣材料o既攤位,不過大部份都係賣泰國料理...五百円細細兜,過下嘴癮嗰啲又有,沙爹又有,泰式雞飯又有...總之就係食o既多...

傻魚買咗兜"泰式炒米粉"食...明明係金邊粉,但係就話係米粉,仲要係難食...睇睇下,見到有啲攤位o既地址係喺傻家附近...唓~咁使鬼喺度食同買咩...

用花瓣砌o既...畀錢可以即場學整...

好多榴槤同芒果...有啲日本人買榴槤食,好多都話唔難...但係側邊啲人就係咁話好臭...芒果就梗係大人氣,排隊打晒蛇餅...行咗一圈就走喇...轉場去秋葉原做御宅族...
係秋葉原買完想買o既嘢就返傻家.傻魚瞓咗三個鍾至起身...

炒意粉食...今日好攰...聽日去睇恐龍...如果聽日仲見紅就要去睇醫生喇...希望冇事喇...
鍾意食泰國嘢o既朋友,聽日係最後一日.地點喺代々木公園,喺原宿駅行過去五分鍾倒...