機民

尋日送走咗肥仔朋友,今日迎接蝸牛小姐...好似好忙咁...呵呵~尋晚餐咖哩以毒攻毒似乎有啲料到,今朝起身開到聲講到嘢喇~四點幾收到蝸牛小姐電話,約五點半喺新宿東口等.傻魚仲諗住洗落機衫,煲落煲湯就去買餸添...乍乍林晾埋啲衫就出門口.之後諗諗下行返轉頭熄咗煲湯火,再拎埋啲衫入屋...點知夜啲會唔會落雨o架...
同蝸牛小姐會合之後就搵咗間傻魚同網友們去過幾次(另一間分店)o既甜品店坐低食個下午茶傾下偈.蝸牛小姐話佢正話喺上野食咗六件(三碟)超難食o既寿司,依家冇胃口食嘢.傻魚介紹咗一款好正o既蛋糕畀蝸牛小姐試下,蝸牛小姐激讚,仲話要介紹朋友o黎食.見蝸牛小姐食咗啲咁難食o既寿司,傻魚就等埋傻馬收工一齊帶蝸牛小姐去食返啲正斗寿司喇...希望蝸牛小姐可以忘記啲唔好o既,淨係記住啲好好味o既,咁就好喇~之前啱啱食完個下午茶,隔兩個鍾又食寿司...好在蝸牛小姐都仲食得落...傻魚?因為啲藥好削胃,所以傻魚比平時食多咗嘢...食完返到傻家第一時間就梗係煲返煲湯喇...冇煮飯都可以淨飲湯...
蝸牛小姐幫傻魚買咗部"吟癲狂",正話傻馬幫傻魚裝遊戲...好嘢!今晚叉爆電,傻魚聽日開始做機民喇...不過應該係打唔夠一個鍾就要瞓返個幾鍾叉下電嗰隻...
聽晚傻馬約咗同事食飯,而傻魚就約咗蝸牛小姐食拉麵...今日咳到甩肺咁滯...希望聽日會好返啲喇...鬼咩...尋日同今日都得嗰十幾度...五月北海道仲會落雪,你話係咪人都癲呀?!!一時就三十幾度,一時就落雪...咁o既天氣唔病就假...傻家啲冬天裝備,到依家都仲未收得...都唔知乜鬼氣候o黎o架...夏天都就到,到底幾時至可以收埋啲冬天衫呀?
各位網友,請原諒傻魚近排覆唔到回應...有睇o架...不過打完篇網誌已經冇精神再覆回應.聽朝一瞓醒,傻魚會覆晒啲回應至做其他嘢...真係對唔住!
備註:

好正o既蛋糕!打多咗個「ク」...正確名字應該係「ミルクレープ」.有興趣o既朋友,連鎖店o黎o架...去呢度搵間就近o既試下喇~ http://www.harbs.co.jp/harbs/ 真係好得o架!

好多外國人去,之前香港某電視節目都介紹過.大部份都係一百四十円一碟,好低食.
ひまわり寿司　-新都心店-
新宿区西新宿1-15-3　（Tel: 03-3344-3576）
営業時間：11時～22時
JR新宿駅西口徒歩3分