都係炸雞惹的禍

一早起身喉嚨勁痛...跟住係咁咳,啲痰整到個喉嚨勁痕...搞成咁,都係因為去旅行嗰陣傻馬係咁叫炸雞畀傻魚食.之後收咗兩箱嘢,係蝸牛小姐啲貨.諗住拆箱用袋裝起啲嘢拎去新宿交畀蝸牛小姐,但係執咗兩個大袋,實在太多太重喇...唯有叫蝸牛小姐上o黎睇下點搞...蝸牛小姐上到o黎一睇,打咗個突...咁樣唔係辦法喎...好在傻魚醒起有個超大旅行袋,即刻摷出o黎裝晒啲嘢入去.哈~啱啱好擺得晒...蝸牛小姐坐咗一陣,上下網,跟住就趕返民宿執埋啲嘢去機場.之後收到蝸牛小姐o既短訊話順利入到倉唔使畀錢...好彩!
蝸牛小姐走咗之後,傻魚就煲咗...

紅蘿蔔粥~煮熟咗o既紅蘿蔔有下氣清痰,清除肺塵o既功効.啱晒傻魚食.成個星期冇煮過飯仔,個雪櫃吉咗咁耐,係時候入返啲貨喇...今次唔敢狂入貨,因為過幾日肥仔朋友返東京,又有幾日唔使煮喇...哈!之前有網友提過傷風感冒唔好食雞,所以傻魚冇買雞...一個雞殺手見到雞,竟然唔可以殺,嗰種感覺真係比死更難受!!!最衰都係啲雞!!!傻魚病完一定要殺晒啲雞!!!

病,冇乜心機煮飯.求其簡單整幾味就算...聽日...傻馬話出街喎...
同場加映:

呢個就係傻魚叫蝸牛小姐買o既袋仔.細細個好得意o架!嘻~