河豚

今朝起身,心情好差...望住間屋,好想喊.執下屋洗下衫煲下湯,搞咗大半日.之後上網見到個網友,問下人幾時返香港.傾傾下收到個喜訊,開心到叫人哋打畀傻魚.結果係講到個電話冇電...跟住約咗網友甲君...

網友甲君請傻魚食下午茶~哎呀...唔記得多謝人添...真係失禮...網友甲君話好唔捨得傻魚,搞到傻魚好想喊...好在忍得住...之後一齊返傻家抄啲嘢過網友甲君部腦度,網友甲君飲咗碗湯就走咗喇...聽日唔知仲會唔會見到網友甲君,如果唔係就要等兩個月喇...

傻馬六點半收工返到o黎擺低啲嘢,跟住就話驅車出去食河豚.咁啱關生打o黎...好在傻魚提下關生咋...如果唔係聽日咪冇人去接機?!!關生問傻馬有冇喊,傻魚話冇,仲問返關生點解咁問...關生話傻魚唔使問都知實會喊o架喇,想睇下傻馬會唔會唔捨得傻魚啫...之後關生同傻馬傾咗一陣,好似係話會過日本陪傻馬喎...收咗線就驅車食住風去搵食喇...

喺呢間食過幾次,好多時都要訂位,如果唔係可能會冇位冇得食.今日冇訂位,可能唔係周末,所以有位唔使搵第二啲嘢食.

每個座位都會有張紙教人點食個河豚鍋同點整個雜炊.叫咗個とらふぐコース...

啲皮好有嚼口,個汁酸酸地,好好食...

河豚刺身好清甜,正~

呢碟嘢一上枱,兩條友即刻畀啲仲識郁o既魚吸引住...拍咗條片o架...不過唔知點解,放唔到上o黎...

炸河豚好鬼好味...傻魚留返嚿最後至食...諗返起,啲口水就不停咁流...

個姐姐仔拎飯o黎嗰陣問需唔需要整埋...有專人服侍,就梗係好喇...好味~食食下諗起聽日就上機,即刻喊咗出o黎...大庭廣眾,費時嚇親人...咪死忍爛忍,狂搵第二啲話題,咁至冇事收到制咋...

雲尼拿雪糕...嘩...原來今日傻魚食咗四球雪糕呀!!!仲唔肥死?!!埋單一萬二千三百七十円...又豪食咗一餐...

返到傻家繼續執屋...專登留返個廚房夜啲洗,跟住先至執行李...點解?咪就係想自己忙啲攰啲,咁咪唔會喊囉...點知...一靜落o黎寫網誌,啲眼淚就收唔到制...望下傻馬...仲喊得勁啲...聽日...雙眼紅腫咁上機...返到屋企繼續喊囉...

旺場

今日都唔知乜事,香港個手提係咁響,勁多人打畀傻魚.一早傻妹就網上勁搵傻魚,跟住網友甲君打o黎問傻魚幾點得閒嘆茶...執執下嘢,朋友又打o黎問傻魚幾時返香港...終於搞掂啲嘢,驅車去郵局寄郵箱...去到都唔使十分鍾就搞掂,返傻家推埋另一架車出路口等網友甲君,然後一齊驅車去買二手漫畫.網友甲君買咗幾本漫畫要o黎學日文會話同生字.買完就驅車返傻家嘆茶...

上次網友甲君食過話好味,所以今日又整.同網友甲君一齊討論下日文,傾下偈,咁又兩個鍾...其間傻魚收到幾個電話,有搵傻魚食飯o既,又有搵傻魚做嘢o既...個個好似約埋一齊今日搵傻魚咁,凈係聽電話都幾忙下...哈~網友甲君走咗冇幾耐,傻馬就返到...見傻馬拎住袋嘢,仲諗住有禮物添...點知原來係薯條...搞錯...明知就開飯仲買薯條食...

啲隔夜肉骨茶好鬼入味.雪櫃仲凈返一日o既餸,不過傻馬話聽晚出街食喎...咁呀...後日臨走之前煮落飯等傻馬收工返到叮返熱o黎囉...聽晚...唔知會唔會喊...

帶隊

尋晚睇電視,氣象台預測今朝東京可能會落雪.今朝神咁早起身,滿懷歡喜諗住睇雪o架嘛...點知...毛毛雨就落咗成日,雪就半粒都冇...不過,都無損傻魚"闊太出巡"o既心情.

約咗網友甲君,網友初春,囝囝,網友靚仔媽,網友伊君同新朋友新手媽媽去上野食晏.十一點半喺車站集合之後就去搵食.一坐就坐咗差唔多兩個鍾.之後網友靚仔媽夠鍾要去接靚仔放學,所以走先.其他人就轉場去飲咖啡,繼續雞啄唔斷噴口水...咁又傾咗幾個鍾.見天色開始暗,就起程去購物.傻魚帶隊先去買超大餃子,跟住去地下食品街買嘢,然後上返地面買海鮮.今日傻魚買咗兩隻毛蟹(一千五百円)同一大盒大トロ刺身(一千円)畀傻馬食...買完嘢就散隊,而傻魚同網友甲君就走咗去時代廣場買嘢.上次去大宮個東急手見到個袋o既內膽幾好用,上網見時代廣場嗰間都有,諗住去買個返香港用...點知去到搵唔到,唯有上網買喇...同網友甲君買完嘢就一齊毛雨中漫步返歸...返到傻家打開個雪櫃睇下整乜好.

見到呢兩盒尋日同傻馬一齊去買o既草莓,好鬼開心...傻魚其實唔好草莓,因為唔鍾意酸草莓.但係日本呢隻草莓,傻魚超愛食~依家咁啱係草莓季,梗係要食返夠本喇...認住呢隻草莓個名,真係好甜!!!唔知香港有冇得賣呢?不過,有都應該好貴.

今晚好似好多餸咁,咪雪返起盒大トロ聽日至食囉.傻馬一返到o黎就拎咗隻毛蟹係咁拆...到傻魚煮完飯,傻馬啱啱食完隻蟹等開飯...

個大餃子真係好味~個底煎得好鬼脆,正!!!煲肉骨茶食咗一半,聽日應該仲好味...聽日有乜搞?仲未知喎...出去寄下郵包咁啩...

運桔

尋晚成晚冇瞓...唔知係咪食咗薑驅風,成晚攪肚瞓唔到...結果今朝成十一點攰到暈咗...傻馬兩點幾收工返o黎,整醒咗傻魚...跟住一齊去原宿幫關生買嘢...去到原宿好肚餓,咁就梗係...

果然係原宿名物,百食不厭~

食完行過呢間三色收費台介紹過o既店...好飽,所以冇幫襯...然後就去裏原宿搵"波特頭".點知..."波特頭"由今個月廿一號開始裝修,要到二月二號至會開返...噢~關生,真係唔好意思...今次又買唔到...順路經過"新平衡",入咗去行咗一圈...總結o黎講,今日去咗原宿運桔!返到傻家附近入貨,同傻馬講一定要制止傻魚瘋狂入貨.結果就梗係傻馬辦事不力喇...好在有啲係生果啫...

個豆腐好鬼正,就咁食都好鬼好味!最衰傻魚要返香港,如果唔係實入定一大堆存倉...不過依家想買都冇得買,個推廣做完喇...進入清倉大行動,開始清嗰啲傻馬唔識同唔會煮o既嘢...

今日去便利店買方包嗰陣見到,畀佢個包裝吸引住...結果忍唔住買咗...又幾好味喎...聽日氣象台預測東京朝早有雪,不過唔會有積雪...聽日約咗一班網友去食晏...哈~

小插曲: 食完飯同傻馬講起唔想一條魚返香港,又講起傻馬冇啖好食...傻馬就話自己返到香港會好開心,喺日本就捱騾仔好辛苦...之後傻魚講返之前自己一條魚喺日本嗰陣晚晚自己一條魚食飯都會喊住食,仲會諗點解傻魚會咁慘...講講下啲眼淚不受控制咁狂湧出o黎...再諗到傻馬好快會經歷同樣o既慘狀,啲眼淚完全收唔到制...希望老細會再派傻馬去澳門短期出差喇...

準備

今日冇去街,同傻馬留喺傻家靜靜地睇下電視聽下歌.見陽光普照,即刻拎張床褥出去曬下.張床褥重到要兩個人抬出去,搞到一額汗...有太陽就梗係要洗埋啲衫喇...之後收到關生電話,叫傻魚買嘢...

仲有五日就返香港.今次行李全部係漫畫同雜誌,衫就得兩件...傻馬話咁多書驚會超重,就叫傻魚執一箱寄返香港.唔使兩分鍾就執咗一箱仔書,聽日枱去郵局寄船...就o黎返香港,最擔心就梗係傻馬之後啲飲食喇...之前教咗傻馬整冬陰公,今日就教傻馬整味噌汁,煎牛肉同煮粉絲...前幾日買咗兩包榨菜,今日切片浸水然後入盒放入雪櫃,等傻馬可以慢慢有排食.

仲有乜嘢要準備?買定啲日用品同即食嘢,提醒傻馬要開窗換氣,教多傻馬一次洗衫要落幾多洗衣液同柔順劑,臨走大洗一次廚房同廁所...應該仲有o架...諗唔起添...算喇...返香港抖兩個月,做少奶奶...然後返傻家o黎一次大掃除...唉~到時實洗死傻魚...

今晚餐飯,因為要切榨菜同教傻馬整嘢,搞到差唔多成九點至有得食...

亂o黎又一餐...今日傻魚食素,因為傻魚唔食得牛肉...都好...食咗咁多餐勁o既,今餐清下腸胃都幾唔錯.傻馬話啲牛肉粒好好味,過幾日等間超市裝修完,去睇下有冇特價先...跟住幾日都會煲啲靚湯畀傻馬飲.聽日又去入定啲貨...呵呵~

鐵路博物館

今日又遲咗起身...乍乍林梳洗完之後就起程...先去食個早午餐.呢間餐廳喺網友甲君介紹o既,之前去咗另一間食.估唔到原來喺傻家附近都有...

啲雞翼好惹味,二百九十九円咋...

上次同網友甲君一齊食過,覺得唔錯...都係三百九十九円啫...

有啲飯焦,好味...四百九十九円...低!食完搭電車去大宮轉車...

搭一個站就到...好多人落車...買飛先...一千円一位...

入口附近呢堆嘢好可愛...

行行下畀傻魚見到呢個牌喎...哈~

似唔似熨斗呀?

可能係周末,好多人一家大細o黎...好多小朋友全場跑...

中間嗰個位會轉...好多人圍觀...

呢隻嘢啲動作好鬼可愛~行完裏面就出外面行...

好多家長帶小朋友坐迷你電車...要另外畀錢o架...行咗四個幾鍾,傻馬終於捨得走喇.搭返電車去大宮,肚仔餓搵食先...唔知食乜好...走咗去美食廣場...

唔係特別好味,可以接受...

傻馬話啲肉醬幾好味...食完行咗一陣,見有大型超市,師奶病發作走去行咗一圈...咁啱做緊草莓祭,啲草莓好平...見有嗰隻勁甜草莓,即刻買兩盒先...返到傻家傻馬竟然唔記得擺啲草莓入雪櫃,仲要擺咗喺個暖爐隔離...冇喇冇喇...熟晒喇...唔靚仔影唔到相之餘,仲要乍乍林食晒啲草莓...傻馬,點做嘢o架!!!

同場加映:

喺鐵路博物館見到好多父母追住啲仔女...其中有一個爸爸好搞嘢...因為...

影唔到個爸爸畀個仔拉住跑添...真係好似放狗咁,笑到傻魚同傻馬差啲反艇咁滯...

瘋狂富貴放題

出咗咁多日街,今日留返喺傻家大掃除.三點幾傻馬收工返o黎話想出去食放題...唔使煮飯仔,梗係好喇~上網搵咗一陣,終於決定去時代廣場十三樓...

六點三十五分攞飛仔,前面有廿一個號碼等緊...勁!!!輪候時間個半鍾,問傻馬等唔等,傻馬話是旦...是旦咪等下囉...

冇預到咁早去都要等咁耐,冇帶任何消遣物品打發時間...無聊唔知做乜好,企咗喺門口個大餐牌度慢慢研究一陣食乜好...等咗兩個鍾零十五分鍾,終於入到店...唔理三七廿一,茶都未o黎就落咗第一個柯打...廿件...

肚仔餓到咕咕聲,傻馬一影完相就即吞兩件先...

傻馬見到啲海膽o既賣相,仲諗住係唔多好味...點知...一擺入口...唔...好好味呀~餓鬼上身,唔使幾分鍾就清晒...即落第二個柯打...

原本有四件手卷,傻馬都仲未影相,傻魚就急急吞咗一件...傻馬,下次快手啲喇...

好正!等咁耐都係低o既...

傻馬食緊嘢無聊睇餐牌,畀傻馬發現有錯字喎...大家睇唔睇到呀?

第三單,擺咗落枱冇耐就有個姐姐仔行埋o黎話最後柯打,問仲有冇嘢想要...好飽喇...唔使喇,唔該~

呢件嘢...真係好味到...入口即溶~可能就收舖,咁啱冇晒トロ差一件唔夠數,所以搭件大トロ...兩條友瘋狂食六十四件寿司,埋單情侶任食價七千三百五十円...都低o既...不過唔可以成日食囉...食完勁飽...車都唔搭,凍死就凍死,行返傻家消化下先...

再入國

今日要去入國管理局,擺低啲銀両整再入國...約咗網友伊君一齊去,但係行到車站至發覺唔記得帶護照喎...即刻跑返傻家摷,跟住接咗幾個電話搞到遲大到.次次都係咁...得閒到想死嗰陣就冇人會打o黎,一有正經嘢要做趕時間嗰陣啲人就好似約埋咁一個接一個打o黎搵傻魚...

去到品川同網友伊君食個晏仔,跟住搭巴士去入國管理局.傻馬話有排等,要搞成個鍾...所以未上去之前就先去買印紙,然後懶醒咁走去影相...鬼咩...傻馬話好似要交相,但其實係唔需要,老點傻魚...傻魚填完個表,拎個號碼就同網友伊君坐低等.應該等咗半個鍾倒就輪到傻魚,行埋去個櫃位畀晒啲文件同證件個姐姐,一分鍾都唔使就搞掂喇.咁就使咗六千円...真係貴~

之後同網友伊君落返一樓去問家族簽證啲嘢...好在詢問處有個姐姐識講英文.網友伊君拎完所需資料就同傻魚搭巴士返品川.之後行咗一陣就一齊搭山手線.唔知乜事,去新宿方向架車等極都唔到,搞到個月台越企越多人.之後企到冇位企,連樓梯都企滿人...終於等到架車o黎,啲人係死迫爛迫,狂向前推咁上車...結果架車係迫爆,傻魚差啲缺氧暈低...網友伊君喺渋谷落車,而傻魚就仲要搭多幾個站...返到傻家得返半條命,個頭痛到死...

原本想煎牛肉粒畀傻馬食o架嘛...暈車好辛苦,冇心機整...

湯都冇心機煲,求其整個即食湯就算...聽日冇節目,留喺傻家大掃除~仲有一個星期,心情好複雜...

落雪

相信好多網友已經報導咗...今朝起身開窗一睇...嘩~講咗個幾星期,終於都落雪喇...傻魚好興奮咁摷醒傻馬,兩條友一齊落街丟不燃順便玩雪.

雖然唔係第一次見雪,但係都莫名興奮~傻魚好似小朋友見到糖咁,開心到手舞足蹈.玩咗一陣見唔夠雪堆雪人,加上好凍,所以就返入屋.傻馬因為今日返晏去個客度,見仲有時間就驅車去新宿影雪景...

好大風,啲雪仲好大粒...

仲越落越大...

今朝十一點得嗰一度咋...傻馬十一點幾返o黎換衫,跟住就返工喇...傻魚亦都跟住換衫出街會網友.今日原本約咗網友甲君,網友初春,囝囝,網友飲品,細仔同網友伊君去惠比寿食晏.前日留咗言畀網友飲品,今朝見仲係冇反應咪打個電話問下囉.原來網友飲品今朝至見到傻魚個留言,趕唔切安排大仔留學校耐啲,所以今日出唔到o黎...冇計...之後上網見到網友靚仔媽留言叫傻魚得閒搵埋佢一齊食飯,即刻打個電話問今日得唔得.網友靚仔媽好爽快,即刻話好.收咗線冇耐,網友初春打o黎話囝囝唔係好舒服,今日又落雪,費時再凍親所以唔o黎喇...噢...少兩個添...唔緊要喇...下次再約過囉.臨出門口收到網友甲君留言話肚痾,要遲啲至到,叫傻魚自己一個去搵其他人先...出到門口見今朝嗰幾袋垃圾仲喺度...又唔記得收,點做嘢o架...唔理喇...返o黎先拎返上樓...

去到惠比寿,遲咗幾分鍾,因為山手線少咗一班車...見到網友靚仔媽,但係仲未見網友伊君...同網友靚仔媽一邊傾一邊等,等咗一陣會合埋網友伊君之後就行去搵食.去到惠比寿,例牌都係食嗰間...食完都仲唔見網友甲君,睇怕都o黎唔到o架喇...傾咗一陣,由於網友靚仔媽要去接靚仔放學,所以走先.傻魚就同網友伊君去買下嘢.行到咁上下,因為網友伊君今晚會宴客所以要早啲返去準備.好耐都冇試過兩點幾就散會.

見仲早咪打畀網友甲君睇下佢點囉.跟住走咗去滾搞人,然後一齊去食下午茶.哈~啱食完個晏又去食下午茶...唔肥就有鬼囉...同網友甲君傾到成六點鍾,之後一齊行去傻家附近間一百円店買嘢,跟住就各自返歸.

今晚傻馬約咗朋友去睇馬戲團,所以傻魚要食自己...原本係傻魚叫傻馬問個朋友有冇飛,諗住攞兩張一齊去睇o架...點知凈係拎到一張,傻馬就自己同個朋友去睇...搞錯呀!!!返到傻家門口,唔見咗啲垃圾...唔通架垃圾車返轉頭收返?入到屋,見傻馬個袋喺度...返過o黎又唔打畀傻魚,搞乜呀...見傻馬煮咗個麵食,夜啲返到o黎實會肚餓,都係煮飯仔喇...

個大餃係尋日傻馬途經上野買o架...上次買熟o既返叮味道麻麻,所以尋日叫傻馬買生餃自己煎...等到差唔多十點都仲未見傻馬...肚仔餓添...唔理喇,煎埋啲大餃食住等.個大餃好好味呀!!!等到傻馬返o黎雖然凍咗,但係塊皮依然好脆,仲有肉汁流出o黎,好好味...正~下次都係買生餃好啲.聽日要去畀錢日本政府使...唉~

炸豬扒

尋晚見個雪櫃咁爆,乍乍林食個甜品先...

前日喺便利店買o既,同傻馬一人一半...啲芝士好味~

今朝起身洗咗一機衫.晾衫嗰陣可能件衫同褲重得滯,從衣架跌咗落地搞到要再洗過...今日約咗新朋友,結果第一次見就遲到...同新朋友,網友伊君喺新宿南口會合之後就行咗去時代廣場.行咗一陣就搵間餐廳坐低等網友甲君.諗咗好耐都唔知食乜好...結果就走咗去食炸豬扒...坐低傾咗一陣偈,等埋網友甲君至叫嘢食...

呢三樣嘢傻魚冇樣好,影完相就算...

傻魚個餐...食完好鬼飽...

網友甲君個餐...飽到食唔晒...之後傾咗兩個幾鍾,突然網友甲君講咗句:「傻魚次次第一次見人就帶人去食炸豬扒...」係喎...第一次見網友甲君嗰陣,傻魚又係帶咗網友甲君去食炸豬扒...咁啱啫...冇乜特別意思o架...見都坐咗好耐下,咪埋單出去行下囉.網友甲君介紹咗啲正嘢畀網友伊君.行到咁上下,網友伊君就去搭電車.而傻魚同網友甲君就一齊行去"企鵝仔"買少少嘢,跟住就各自返歸.

行到傻家附近個交番,見到有兩個四十幾歲o既女人喺度問緊路...八婆傻魚於是企埋一邊聽...個警察叔叔雖然好努力咁用英文教佢哋點行,但係嗰兩個女人都好似唔係好明咁...見個警察叔叔講完轉身走嗰陣嗰兩個女人講廣東話,即刻嗌住人哋.咁啱傻馬經過見到八婆傻魚,於是兩條友就教人點行去新宿三越.兩位香港同胞連聲道謝,仲話好彩遇到傻魚同傻馬.見人哋咁迷茫,幫得咪幫囉...之後好開心咁笑住同傻馬一齊返傻家.一入屋即刻拎啲湯料出o黎煲返煲靚湯先...

尋日見一盒四嚿鰤魚賣七百七十七円咁平,諗都唔諗就買咗一盒...結果尋日食凈兩嚿,今日乍乍林食埋佢...傻馬話煎好味啲,咪又煎囉...

飯後果有超正士多啤梨.一盒十粒,五百円咋...過幾日又去買盒先...聽日"闊太"又出巡,約咗網友去食晏...呵呵呵呵~