尋晚餐飯傻馬一路睇電視,一路慢慢嘆...結果食咗兩個鍾,左住人收工...今朝七點起身梳洗完,等到八點幾至有人o黎收床舖...之後由專人將啲早餐擺入房...
諗住係一餐普通早餐...
原來內有乾坤...傻魚凈係飲咗啲湯,隻龍蝦頭畀咗傻馬食.食完休息一陣就夠鍾交房.然後就坐酒店架專車去熱海駅轉巴士...
由今日開始到三月三號,熱海個梅園有梅祭.
喺入口附近有幾棵開得好靚o既黃色梅花,仲好鬼香添...
大部份都仲未開花...行行下聽到有水聲...
好舒服~
間唔中見到一堆好靚o既梅花,傻馬會停低狂影.
路邊小花好得意,又影...
除咗花仲有啲庭園同博物館...
臨走見到有一棵開得幾靚...唔使兩個鍾就行完,然後搭巴士返駅附近買手信...
經過聞到好鬼香,忍唔住停低望下,跟住忍唔住買咗盒...買完搭電車去小田原...
肚仔餓要搵食...好似幾好咁...
是日午餐係三日裏面最好味,食得最飽o既午餐.見仲有時間,喺駅附近行下.
雖然係普通城堡一座,但係靚過尋日去o既熱海城...
行過啲舖仔見有抺茶雲尼拿雪糕...雖然天寒地凍,都忍唔住整返個...冬天食雪糕可以慢慢嘆,唔怕溶...三點幾行返駅行下商場暖下個身,然後搭四點半車返新宿.就係咁玩咗三日.交通費加住宿加食嘢加買嘢再加入場券,用咗七萬円...返到傻家散晒...攰到唔多願煮飯仔...諗起之前買咗包瀨粉,試下好唔好味先...
瀨粉一般...啲魚餅係今日喺熱海買嗰啲.食咗一半,好好味~聽日食埋嗰一半先...茄子同肉碎都係前幾日買落o既,費時再擺...聽日又約咗網友食晏...呢排好多節目,希望唔會好似上次咁,因為玩得太多而病喇...
沒有留言:
發佈留言