烏龍事一籮籮

今朝傻馬突然彈咗起身,仲整醒傻魚添...諗住傻馬係急要去廁所,點知原來係唔知醒.睇睇個鍾,嘩~十點喇...原來傻馬換咗個新電話,擺咗喺廚房度叉電,所以聽唔到電話個鬧鍾.最搞笑係,喺傻馬去緊廁所嗰陣個新電話響喎...咁傻魚諗住係個鬧鍾,咪按熄佢囉...之後傻馬去完廁所個電話又響,見傻馬接電話...吓?!!乜唔係鬧鍾o黎o架咩?原來係傻馬個同事打o黎問傻馬喺邊,做乜仲唔去個客度...撞鬼囉...搞乜將個電話鈴聲整到成個鬧鍾咁呀?傻魚自己一個笑咗成朝...

之後傻馬急急腳出門口,突然又話冇拎鎖匙喎...傻魚見傻馬趕住返工,咪畀住自己嗰條傻馬先囉...咁啱尋晚終於食晒雪櫃啲舊嘢,今日要去入貨.四點幾出門口之前傻魚四周圍摷傻馬條鎖匙,摷咗好耐都搵唔到...去咗邊呢?打畀傻馬,傻馬又唔接電話喎...點算?唔理喇...唔入貨今晚冇飯食喎...樓下又有密碼鎖,唔鎖門都應該冇事啩...成層樓都係屋主啲親戚,有乜咪搵屋主囉...結果門又冇鎖,窗又冇關,就咁驅車去入貨.

每次入貨,起碼會走兩間超市.一間專買菜,另一間就專買肉.今日冇鎖門,有啲擔心...所以求其喺買開菜嗰間超市買少少豬肉,跟住就飛車返傻家.尋晚傻馬話想食泡菜鍋...

又整咗一大煲...原本拎咗個細啲o既土鍋出o黎,諗住細細鍋就算...點知切切下啲材料,發覺個鍋唔係好夠擺,所以換咗個大啲o既煲...開頭好比心機擺啲材料,諗住靚靚一煲影相o架嘛...點知越擺越冇位,搞搞下排都排唔到...算喇,就咁倒晒落個煲...搞到肉又見唔到,豆腐又見唔到...係咁迫傻馬食,差啲食唔晒...啲材料用咗一半咋...傻魚己經就住o黎落,都搞成咁...睇o黎以後乜都用三份一就啱...凈返嗰一半,後日再整過...到時擺個靚鍋影相先...聽晚整另一樣傻馬好愛o既湯...嘻~

後記: 呢幾日傻馬係咁倒瀉嘢...正話又差啲倒瀉水,好在有關水樽蓋...現時記錄-水兩次,茶兩次,梅酒一次...搞到啲地毯要洗完又洗...