平靚正

今日仲諗住冇街去,醒咗都死唔願起身...跟住收到網友太太個短訊話會同囡囡去新宿,問傻魚得唔得閒...好嘢!有街去~即刻覆網友太太,但係等極都冇回音...打電話畀網友太太又飛留言喎...過咗半個鍾,終於收到網友太太個電話.原來網友太太搭車嗰陣畀人叫熄電話...網友太太原本諗住約傻魚三點鍾.後來見傻魚可以十五分鍾到新宿,所以就約實十五分鍾後喺新宿南口等.傻魚準時十五分鍾後到,但係見唔到網友太太.原來網友太太走咗去附近商場行.見到面之後,第一件事梗係同囡囡打個招呼先喇.網友太太有啲事要辦,所以傻魚就睇住囡囡.諗住第一次見,囡囡應該唔多會睬傻魚.囡囡好乖,坐定定食包仔.食完唔見媽咪又唔會喊,仲同傻魚玩咗好耐,又畀傻魚抱...真係氹得傻魚好鬼開心.

網友太太辦完正經事之後話想食迴轉寿司,問傻魚有乜好介紹.傻魚梗係第一時間帶網友太太去嗰間平靚正迴轉寿司店喇.網友太太一路食一路話好味,仲話下次一定會同老公再o黎食.四點鍾下午茶時間,兩條友係咁食...每人食咗七,八碟...弊!再咁食落去今晚仲使食飯o既...即刻收皮唔敢再食...呢餐下午茶好低,位位一千四百円...仲幾飽下添...大人津津有味食緊寿司嗰陣,囡囡好乖咁坐喺車仔食餅仔同包仔.食完就送網友太太去車站,跟住傻魚就行返傻家.途中經過"牛牛",走咗去買肉同牛奶.返到傻家都冇十分鍾,就見傻馬返o黎喇.五點都冇就收工,傻馬份工都幾唔錯.六點鍾嗰陣傻馬自己一個去新宿紀伊國屋,傻魚啱啱去完新宿所以冇跟埋去.煮完個飯仔差唔多八點,傻馬都仲咪返...等咗半個鍾至見人,啲餸都凍晒...

整返熱啲湯就開飯.今晚餐飯勁呀!有菜,有魚,有肉,有海鮮...樣樣都係傻馬鍾意食o既,傻馬食得好開心.食緊飯嗰陣...

傻魚:「傻魚聽日約咗網友甲君,網友媽咪同網友太太去惠比寿食晏喎.」

傻馬:「咁開心呀...又成班闊太去食下午茶...」

傻魚:「咩闊太呀?肥太就有個...唔係食下午茶呀.食晏呀!」

傻馬:「一樣啫...食完晏行下,跟住又去食下午茶o架喇...」

傻魚:「...」

好耐冇見小朋友,好掛住小朋友呀...同埋太耐冇同小朋友玩,啲時差又返晒o黎...聽日開心囉...希望小朋友仲記得傻魚姐姐喇...