甜品天堂

今日傻魚又約咗幾位靚女網友.今次係去渋谷食自助餐...傻馬今日下午去個客度,所以今朝唔使返公司.冇理由要傻馬自己留喺傻家食包,而傻魚就去食"大餐"o架嘛...梗係嗌埋傻馬一齊去斟下茶遞下水影下相...十一點約咗網友甲君喺駅等...但係等咗一陣都仲未見人...唔通網友甲君唔記得今日約咗食晏?!!都係打個電話畀網友甲君穩陣啲.原來網友甲君尋晚食咗感冒藥,所以今朝唔知醒...咁傻魚咪同傻馬去渋谷會合其他人先囉.去到等咗一陣就見到網友初春同囝囝,之後收到網友媽咪個電話話等咗一陣都仲未冇車,會遲到.三大一細傾咗一陣偈就見到網友媽咪推住小朋友o黎到.見網友甲君仲未到,一行人去附近"閣樓"行咗一陣.因為傻馬點幾鍾要去個客度,而網友甲君又差唔多到,所以大家就先去餐廳食住等.

甜品天堂渋谷店啲裝修紅卜卜...呢度個自助餐一千四百八十円一位,食九十分鍾.唔貴,啲食物都唔錯.

呢個自助餐主打係甜品.呢度只係其中一部份咋...傻馬食咗兩大碟蛋糕同幾杯番茄香草湯,跟住一點半就起程去個客度...

原來有咁多嘢飲擺咗喺度...傻魚仲傻下傻下四周圍搵咗好耐,結果搵唔到就整咗杯蘋果茶飲...個個食咗幾件蛋糕就飽到上心口...坐到差唔多夠鍾至離開...行到出街冇咁焗,加上有啲風,小朋友好快就瞓咗.網友媽咪話想去行迪迪尼店,但係冇人記得間嘢喺邊...搵咗一陣,問下人,終於去到目的地.行咗一陣小朋友就醒咗.瞓咗一陣,叉完電o既小朋友醒神晒,仲好好笑容.傻魚見小朋友成日整個招牌笑容,諗住影低佢.小朋友見傻魚拎部相機出o黎,即刻o黎幾款笑容畀傻魚影...

小朋友間唔中都會咁樣奸笑...好得意...等咗一陣終於等到喇~

幾鬼可愛呀!!!

等網友初春買完嘢,由於大家都行得好攰,所以就過咗去對面搵麥叔叔飲杯嘢.一坐低就傾到不知時日...結果傾到四點幾至散會...之後同網友甲君去"閣樓"行下睇下嘢,然後返傻家附近間超市買餸.傻魚喺"企鵝仔"買咗個蒸鍋,跟住就同網友甲君各自返歸.返到傻家六點鍾,傻馬已經坐咗喺部腦前面狂上網.搞錯!仲早過傻魚返o黎...因為自助餐食得好飽,所以今晚夜啲食飯...

新鍋上爐即刻蒸兩味.原本係一碟過o架...可惜隻碟唔夠大,所以被迫分兩碟蒸.食食下飯至醒起唔記得落啲冬菇去蒸雞...衰咗添...聽日開始又三連休,傻馬又點會肯留喺傻家呀...聽日去邊?聽日咪知囉...哈~