今日約咗網友甲君,"安姐"同"娜姐"去銀座同六本木行街.星期六原本有祭,可借今日都仲係落緊雨,所以冇得睇.傻馬唯有自己"留守番"打機.
會合完之後就係咁蕩...之前講咗話會去六本木間"蝦拔屎"食晏,但係佢哋實在太掛住個甜品放題,想再食多次喎...講講下結果變唔去六本木,轉軚去上野然後去新宿返兜甜品放題.行到攰攰地,諗住搵間咖啡店坐低飲杯嘢抖下,點知要等位,仲要係唔知要等幾耐嗰隻...唔鬼等,拎走算喇...見銀座冇乜行,不早啲過上野喇...拎住啲飲品就去搭地鐵...由於傻魚掛住望其他人,一不留神杯"熱飲"就乘機想"走佬",飲咗幾啖o既飲品就咁變咗地上o既"一灘污水"...嘥嘢呀!!!
去到上野網友甲君離隊自己去睇嘢,而其他人就去行嗰條"手信街"."娜姐"上前o黎嗰陣係指定去某間大手信舖,今次都唔例外.嗰間手信舖隔離有得食墨魚丸...
傻魚同"娜姐"就唔理三七廿一,買咗個大o既o黎食,仲一路"混醬"一路拍片,好搞笑好開心."安姐"自己一個去行手信舖,所以冇預佢.諗住一陣網友甲君o黎到,佢兩個可以一齊食個細o既...
買完手信,食完墨魚丸,轉場去飲酒食串燒.係!冇錯...日光日白,三點唔夠就去飲酒.唔好話喎...係多人到冇位要等o架...後來個老細同佢o既朋友讓咗個細位出o黎,四條友就迫住坐.網友甲君係咁話個太太係靚女,氹到人家非常之開心.於是四個外國人同三個日本人就咁少少日文加英文"暢談"起來.酒一到,七個杯互撞,乾杯聲四起,之後就不斷有人嗌乾杯.期間個先生興奮得滯,變咗"滾地大冬瓜",笑到個個肚都痛...仲個老細仲搞笑,問傻魚大家喺咪來自菲律賓喎...傻魚話唔係,係香港.個老細一聽到"香港"兩個字,就即刻拉張櫈仔坐喺傻魚隔離同傻魚講佢好鍾意香港,今年已經去咗四次喇.講到咁上下,個老細就走咗.由於傻魚食咗太多墨魚丸,又要留肚食放題,所以冇食串燒.睇樣好似好好味...搵日再去試下先.
坐到咁上下,又要起程過新宿."娜姐"飲咗幾啖酒,變咗個大番茄,仲有少少醉添...搭車前個個走咗去"補妝"...話乜要見人所以要補補佢喎...去到新宿五點幾,見有時間咪周圍行下囉.約咗傻馬七點喺餐廳門口等.行到六點幾就上去排隊,再打個電話叫傻馬出門口.傻魚留低看管住啲嘢同排隊,其他人就繼續行街.傻馬準時七點鍾到,七點四就有位可以入座喇...
傻魚例牌第一碟食咸嘢,呢碟係傻馬o既...
再o黎多碟傻馬o既...第一轉就食佢...
傻馬o既第二轉...白色嗰嚿係豆腐o黎o架...
晚餐有牛扒食...
傻魚拎o既...晚餐多咗左邊嗰啲焦糖布甸仔...好好味,傻魚食咗好多.另外個意大利芝士蛋糕仔都好鬼正.白色嗰兩個係芝士,好味~
o黎親傻魚必食o既...晚餐多咗啲香蕉片喺裡面...
傻馬o既第四轉...中間仲有一轉係湯...
晚餐多咗個芝士薄餅,好好味!!!
傻馬又o黎多個...
傻魚都唔執輸,整多個...酸酸地好正~
食到尾聲個個都嗌辛苦...樣樣都好想食,但係就食唔落...之後無聊拍片狂"爆",仲發生咗段"噴茶事件"添..."娜姐"噴到傻魚半個身濕晒...全個過程拍低晒,有晒證據o架!打唔到"格仔"就當然唔會擺上o黎喇...總之就玩到癲晒喇...
走嗰陣搭升降機,傻魚問傻馬,如果大力撳傻馬個肚,會唔會嘔啲嘢出o黎...傻馬就話會癩屎...企喺隔離o既"娜姐"就話傻馬核凸...咁傻魚就話"娜姐"同傻馬,一個放屁一個癩屎,最佳拍檔."娜姐"即刻駁咀話左隣右李呀...傻馬接住講咗句"癩濕幾個枕頭...".笑爆咀呀!!!返到傻家,傻魚忍唔住手...
"哪~癩濕幾個枕頭 放多幾個屁臭 這麼臭 怎麼會有觀眾唔會走"
其實仲有下文,但係太核凸驚出唔到街...結果笑死咗隻馬~哈哈哈哈哈哈~
"安姐"同"娜姐"聽日走喇...香港見喇~
