玩轉原宿

今日約咗"原班人馬"十一點半喺竹下通口等,傻魚準時去到唔見人喎...打畀網友甲君,來個個唔知醒...等到十二點幾至見到"安姐"同"娜姐",而網友甲君就有啲事要辦遲啲會合.先行竹下通,傻魚介紹咗間"三百一十五円飾物店"畀佢哋.當然個個都有斬獲喇.傻魚買咗對超大圈耳環畀傻細妹.行完竹下通,網友甲君咁啱到咗原宿,就約喺"新平衡"門口等...點知...傻魚"閉關"得太耐,連"新平衡"搬咗都唔知...依家變咗乜?

隔離係香港都有分店o既"平衫店"...

"新平衡"變咗"永遠廿一"...多人到要排隊入去,裡面係迫到差啲行唔到.傻魚同"安姐"喺地面嗰陣睇咗陣飾物,揀咗幾樣嘢之後已經冇心機行.傻魚去排隊畀錢,"安姐"就迫返出去等.真係好似唔使錢咁,好多人,好攞命.
人人都肚餓,去食嘢喇.途經銀行,傻魚去撳錢,其他人就去對面睇"袋".傻魚諗住帶大家去食拉麵,點知間拉麵嗰棟樓成棟裝修緊...啞咗!!!結果由網友甲君帶路去食"洋食"...開餐前,先o黎個"枱面交易"...傻魚找換店短暫開業...哈~

個沙律好味...唔記得影包添...

網友甲君碟扒...好似好正咁喎...

"安姐"同"娜姐"個意粉."安姐"好好人,分咗個帶子畀傻魚食.

傻魚個番茄雞意粉...好味~

食後傻魚加咗個"南瓜慕絲",好正!
食飽去行裏原宿,然後去搵"猿人"...網大甲君會合埋另一位朋友一齊行.之後傻魚就同"娜姐"離隊去搵"新平衡",而其他人就返竹下通行."新平衡"搬咗去好遠,途經表参道山,入咗去借廁所,然後食咗個"快茶"...身水身汗去到,冇嘢啱...回程"娜姐"話抄小路喎...經過...

有睇"余命一ヶ月の花嫁"o既朋友一定認得呢間教堂.原來喺原宿..."娜姐"好鬼型呀!!!喺"哈囉拮地"門口會合網友甲君同"安姐",然後行去渋谷.中途經過無數店舖,留低唔少銀兩...幾經艱辛,終於到咗渋谷.真係由天光行到天黑...行咗一陣,傻魚又要離隊返歸喇...
原本約咗傻馬去捕平嘢,但係傻魚費時傻馬呆等,所以叫傻馬自己買完就走...捕咗乜平嘢返o黎?

半價一千八百九十円,低呀!!!

整埋個蕎麦麵,食得!!!

飯後果有超甜西瓜!幸せ～