大光燈

尋晚因為好早食飯,所以同關生,未來關太拜別之後行返傻家途中經過一間韓國超市...

傻馬話想食參雞湯喎...咪買包返o黎試下囉.又幾好味喎.不過食完好唔舒服.可能傻魚食緊感冒藥o既關係啩...

今朝原本約咗關生十點半一齊去淺草...傻魚今朝勁眼瞓,咪同關生講約遲啲至去搵佢哋.瞓到十二點幾至起身,搞下呢樣,做下嗰樣,話咁快又兩點...講好咗兩點半去原宿搵關生o架嘛...等極傻馬都仲唔肯離開部腦去換衫出門口...激死!結果三點幾去到原宿搵埋關生,一行四人行去渋谷.全程傻馬同傻魚就好似兩盞大光燈咁...關生同未來關太係咁曬恩愛,真係...飽晒~多謝關生同未來關太!今晚關生同未來關太訂咗枱食飯...喺傻魚幫關生訂o既,關生話要求婚嘛...點知喺香港畀個"程咬金"過咗一棟,求婚提早做咗...所以今晚凈係去食個飯仔...傻馬同傻魚送咗關生去餐廳附近就轉身搭車去上野.

買咗盒墨魚丸返傻家食.跟住走咗去魚市場睇刺身...嘩~都幾貴下喎...算喇...去地下食品街買大閘蟹囉...去到唔見個靚姐之餘,仲唔見晒啲平公蟹喎...搞錯呀!!!唔買喇!行返上地面,見啲魚檔喺咁叫價...

幾平喎~傻馬咁想食蟹,咪買咗一盒毛蟹囉...二千円有兩隻,都幾大下o架~返到傻家附近又走咗去超市入貨...因為關生話聽晚上傻家食飯嘛...買定啲牛肉囉.一返到傻家,傻馬已然急不及待拎盒毛蟹出o黎影相,跟住拎咗隻去"開刀".

一年話咁快又過咗喇~祝大家二零零八年身體健康開心快樂事事如意~聽朝約咗關生倒屎咁早去淺草踩人...

關生駕到

今日關生帶未來關太o黎東京玩.傻馬同傻魚成日留喺傻家等關生電話.又話十二點幾到,四點幾都仲未有電話...關生搞乜呀?原來關生唔記得喺日本打本地電話要加返個零,結果打咗幾個鍾都打唔到...關生喺四點幾o黎到傻家樓下,嗌咗幾聲都冇人應,跟住就走去附近啲舖借電話.關生終於都搵到傻馬喇...陪關生返酒店擺低啲行李之後,四人行去新宿搵食.關生今次喺日本o既第一餐食乜?仲使問咩...梗係咖哩喇...帶咗關生去中村屋,食完行街街...九點幾返散會喇.聽朝約咗十點半集合...去邊?聽日咪知囉...

呼吸因難

今朝起身傻馬話搵地方去下...點知諗咗好耐都仲未諗到去邊好.咁啱網友向日葵打o黎約傻魚去原宿,傻魚可以順便幫關生買嘢.賴低傻馬喺傻家慢慢諗去邊,傻魚兩點喺原宿會合網友向日葵同男友,跟住一齊去食嘢.又識到新朋友,真係開心喇~食完一齊行下竹下通,跟住一齊去幫關生買嘢.點知...冇開門喎!!!放新年假放到三號...搞錯...再行多一陣傻魚就同網友向日葵及男友講再會.返到傻家附近約埋傻馬去"企鵝仔"同超市大量入貨.

傻馬今日自己一條友走咗去邊?自由が丘囉...

之後又去咗渋谷...

無端端影花喎...

今日見有咕哩,咪係咁買囉...又入爆咗個雪櫃同冰箱...諗住煮飯仔食,傻馬突然話想食意粉喎...

求其整啲意粉,但係好畀心機煎啲雞塊.傻馬話啲雞勁好味,啲皮夠脆.正~

喺超市見到超大士多啤梨,買咗盒o黎食.好鬼甜呀!傻馬係咁望住傻魚食,幾驚傻魚話酸,個樣勁搞笑...因為傻魚唔食酸士多啤梨,一定會迫傻馬食鬼晒啲酸o既...傻馬見傻魚食得津津有味,即刻放心繼續上網...傻馬...唔多鍾意食士多啤梨,所以畀傻魚食鬼晒...呵呵~食完飯後果,個鼻塞晒,差啲窒息...好辛苦呀!!!

打敗仗

狂蒲o既結果係乜?今朝起身頭重重,喉嚨痛痛哋,仲有少少鼻水添...乍乍林食塊包,跟住啪兩粒傷風感冒丸落肚...食完藥諗住會眼瞓,點知眼光光一啲睡意都冇.隻藥都唔係無睡意,點解唔眼瞓o既...唔理喇...攞正牌攤屍呀!連續煲咗三個鍾劇集,都仲係鬼打咁精神...話畀人知有病都冇人信...

傻馬今日返半日,成點鍾至去返工,七點都冇就返到傻家...做埋今日就開始放九日假...原本諗住(又)去下遊行,點知關生後日帶埋未來關太o黎東京玩...咁唯有遲啲至去旅行囉...

今日個鼻塞塞地,冇乜嗅覺同味覺...

個雜菜雞翼唔夠味,失手添...傻馬拎住樽椒鹽係咁灑,但係又唔敢出聲話唔夠味喎...梗係喇...傻魚叫傻馬試味嗰陣,傻馬話夠味o架...唔關傻魚事o架~(賴得就賴!)之後傻馬係咁迫傻魚飲湯,搞到魚肚仔成肚水係咁頻頻去廁所...今晚都係早啲瞓,聽日傻馬又話唔知去邊玩喎...

"蠔"一豪

今朝一早畀個電話嘈醒.之後連續幾個電話,煩到爆...到咗食晏時間,見網友甲君話自己一個食,就即約埋去新宿.行到去新宿,諗唔到食乜好...走咗上車站上面睇,跟住就行咗去一間食蠔o既餐廳.今日實行"蠔"一"蠔"喇~佢個午市套餐都只不過係一千円,加餐飲就畀多二百円...一啲都唔貴之餘仲好好味~一定會返兜...食完行咗一陣,跟住去飲杯嘢...然後去買少少嘢,跟住就散隊喇~

傻魚返咗傻家諗住拎啲嘢轉戰下場,點知收到網友乙君o既電話,話轉咗地點同時間.都好,可以慢慢唔使咁趕.下場同邊個去邊?網友千年搬走咗,咁啱呢幾日返咗o黎,咪約埋網友乙君,網友下午一齊出去食餐飯仔飲杯嘢囉...七點半喺品川集合完之後,搵咗幾間居酒屋都冇位.依家咁多人搞忘年會,好難搵位...行行下行返車站走去上面啲餐廳睇下.見有間爵士餐廳幾好,就呢間喇...難得豪一豪嘛...又食又飲,有傾有講...個個都講到唔願走.由八點坐到十一點幾.如果唔係驚搭唔到尾班車,睇怕都冇人願起身埋單.今日一聚之後,又唔知要等到幾時至可以見到面.好唔捨得呀!網友千年,網友乙君,你哋如果返o黎關東,記住搵傻魚食個飯仔喎...有機會傻魚都會去探下你哋o架~希望你哋唔好覺得傻魚煩喇!

尋日做阿茂整咗啲乜?

今日派咗畀啲網友.遲係遲咗啲...不過有心唔怕遲嘛!三連休走咗去玩,返o黎聖誕節又畀傻馬拖咗出街冇時間整...諗住尋日一早起身整完拎出去派,點知趕唔切...咪搞到咁遲囉...今日傻魚咁開心,咁傻馬晚餐食乜?自己煮公仔麵囉.呢個公仔麵唔係一般公仔麵咁簡單.傻魚臨出門口嗰陣拎咗兩隻大冰蠔,一隻大冰帶子,十幾隻細冰蜆,解埋凍擺喺包公仔麵隔離.傻魚出去豪,冇理由要傻馬咁淒涼o架嘛...嘻嘻~

小插曲: 正話同網友食緊飯嗰陣收到關生個電話.

關生:「傻魚嫂呀,講個笑話畀你聽呀...我屋企個姐姐竟然認錯咗你喺我老婆喎...」

傻魚:「咁搞笑?」

關生:「係呀.姐姐同我老婆講佢上次好似係肥啲喎...呢個姐姐新o黎o既,之前我老婆返香港嗰陣都未見過佢...搞到我都唔知點解釋好.你知喇...我咁忙又成日唔喺屋企,邊得閒帶第二個女仔返屋企啫...好在諗到係你咋...你又係白白凈凈,我老婆又係白白凈凈...只係你肥啲啫...可能咁樣個姐姐至會認錯...差啲搞到離婚呀...」

傻魚:「離婚?乜你結咗婚喇咩?」

關生:「一樣啫...」

跟住畀咗個電話未來關太同傻魚講,傻魚梗係即刻澄清喇~畀人誤會就唔好喇...返到傻家講返畀傻馬知,笑到傻馬反轉咁滯.

唱歌

今日約咗網友甲君,網友乙君,網友媽咪,小朋友,網友初春,囝囝,網友太太,囡囡,網友下午同兩位公子一齊去唱歌.去到秋葉原集合,網友媽咪因為肚瀉缺席...而網友太太因為囡囡唔舒服,所以o黎唔到...結果五大三細反轉"大回音".開頭啲大人係咁不斷入歌,而啲細路就不斷搶咪...搞搞下,啲大人掛住傾偈,就不斷入歌畀啲細路唱.真係大人細路都玩得好開心.臨散會之前仲喺門口影大合照...啲相喺邊?唔好意思,今日傻魚掛住做阿茂,唔記得帶相機...阿茂整咗乜?聽日至開估...

今日傻馬四點就收咗工,打o黎搵傻魚嗰陣傻魚唱緊歌.早收冇地方去咪返傻家囉...

尋晚臨瞓前隊咗支香檳同半個西餅...橫掂都肥咗囉,唔理喇...今日唱完歌返傻家繼續做阿茂搞埋啲嘢,跟住就煮飯仔...

個辣醬茄子超辣,食到傻馬成頭汗...下次都係少辣算喇...聽日...可能又有飯局...真開心~

拍拖

今朝起身即刻洗一機深色衫...去完旅行嘛...冬天晾衫要兩日至乾得透,仲有一大機白色衫要洗...不過冇位晾,點算?冇計,後日至洗囉...

尋晚餐燒烤...因為冇帶相機,用傻馬部電話影o既...傻馬正話至交張相畀傻魚.

尋晚發姣學人應節買o既聖誕蛋糕...味道麻麻...

今日喺傻家做下清潔.兩點幾傻馬打o黎話會早收,問傻魚想去邊...傻魚邊都唔想去喎...條街咁多人...傻馬見傻魚未去過新丸,所以約傻魚去行下順便睇下燈飾.見傻馬興致勃勃,是旦囉...即刻煲落煲湯,跟住臨出門口擺埋啲米入飯煲.點知準時去到,傻馬仲未收工.又話早收o既?!!搞到傻魚傻下傻下周圍蕩...終於等到傻馬現身,行咗一陣見有間餐廳幾啱關生喎...即刻訂個位先...終於了咗條心事...訂埋花就大功告成喇~做完緊要嘢,拍住拖去睇燈飾先...

新丸門口棵聖誕樹.係用幾種唔同顏色o既花砌成o既...打埋燈,好靚~

行人路同馬路中間舖咗好多花...

好鬼多人,頂唔順.乍乍林影完就返歸喇...臨走前又買咗個聖誕蛋糕.一陣食蛋糕,嘆香檳~正!返到傻家附近,傻馬自己返去先,而傻魚就去入貨.喺超市諗咗好耐至諗到要煮乜.入完貨快步返傻家煮飯仔...

煮釀青椒嗰陣,傻馬突然伸個頭去廚房話好香.

傻馬:「傻魚,整緊乜呀?好香椒鹽味喎...傻馬想食~」

傻魚:「椒鹽味?!!冇整椒鹽喎...鹵水就有煲...」

傻馬:「咁唔食喇...」

傻魚:「@$#%...」

跟住傻馬走過o黎望...

傻馬:「咦?!!咩o黎o架?嘩~就係呢隻味,好香呀!」

傻魚:「釀青椒...呢啲係豆豉汁o黎o架...」

傻馬:「正!!!食得飯未呀?」

結果開飯嗰陣傻馬掛住講電話,傻魚食完都仲喺度講緊...嘥氣~

豪華遊(三)終極篇

日光最出名係乜?咪腐竹囉...

周圍都見到,買咗盒...

食過覺得口感好得意...買!

今朝七點起身,梳洗完就到八樓...

食早餐.估唔到早餐都有咁多嘢食.從未見過傻馬早餐食咁多嘢...食完仲有時間,傻馬諗住上頂樓浸一浸.但係到最後都係冇去到...懶...十點鍾畀完錢,退完房就開始今日o既終極行程~三個半鍾環遊世界之旅!

喺酒店買入場券,平三百円...但係就用咗三百四十円搭巴士去...

去到竟然落雨喎...今次真係要改名,叫"三個半鍾雨中環遊世界"...

千祈唔好問傻魚去過邊...你知喇...用咁短時間去咁多地方,又點會記得晒去過邊啫...行完兩條友攰到爆之餘,部相機都爆埋...原本諗住唔食午餐,但係都係頂唔順走咗去搵食...

一啲都唔好食...不過冇計,求其囉...

傻馬話冇乜味道,係咁加醋,加辣油,楜椒粉...食完就等巴士返鬼恕川溫泉駅,再轉電車返日光搭特急返新宿.好在早咗起程,如果唔係今日可能要滯留日光呀!兩個鍾車程,條友係咁狂瞓...今晚做定鬼都得喇...返到傻家執完嘢又出街搵食...走咗去附近食韓國燒烤.間嘢長期都咁多人,難得今日咁啱唔使等位,傻馬即刻行入去.食飽買咗個聖誕蛋糕,依家食緊~今次豪使十萬円玩咗三日.下次要平遊喇~

在此祝大家:

聖誕節快樂~

豪華遊(二)

今朝七點起身,打開窗一睇...落雨...

尋日唔記得影,今朝補影返...其實尋日錄咗條片,可惜太大擺唔到上o黎...等聽晚返到傻家用傻馬部腦壓細啲再補擺...之後乍乍林梳洗完...

七點九準時去食早餐...

食完行出酒店,見到出面有個浸腳o既溫泉...

返到房諗起尋日買咗呢個布甸唔記得食...即刻消滅咗佢...跟住傻魚又走出庭園仔浸溫泉,而傻馬就睇尋晚喺大堂借o既碟...傻魚浸咗半個鍾就返房執嘢準備退房.十點鍾畀完錢退完房就坐酒店專車出車站.原本諗住搭嗰架去忍者村o既專車...可惜時間唔啱要等一個鍾,傻馬又唔想浪費時間喎...

搭電車囉...呢架車只停兩個站...

跟住轉呢架特急...

十一點唔夠就到咗鬼恕川溫泉...

見好多人同呢隻嘢影相...傻馬又影埋一份.之後轉巴士去忍者村...

其實忍者村個真正名稱係日光江戶村.喺鬼恕川溫泉駅個巴士售票處買入場券,只需四千円.

去到行下睇下,一有劇場就走去睇...十一點半去到,玩到關門前十五分鍾...搭三點五十分架巴士返駅,再轉酒店專巴...等嗰陣至發現原來忍者村都有專巴去酒店...笨咗...

呢間酒店超大...呢間房係全酒店最平o既,因為窗外完全冇景...唔係傻魚貪平,只係其他有靚景或有私家露天溫泉o既房都爆晒...冇計...

沖沖下茶,傻馬突然講咗句:「呢啲先至係酒店...」呢間酒店房內o既設備真係好齊全.今次住最高嗰層...

見仲有個幾鍾至食晚餐,傻馬走咗上樓上頂樓浸露天溫泉.傻魚就留喺房吽...

七點三準時到八樓餐廳食自助餐.一行入去,傻馬嘩嘩聲...梗係喇...啲食物種類多到每樣食少少都試唔晒...

除咗呢個鍋,仲有其他幾款唔同o既鍋物...細細鍋,好得意.

牛扒即叫即煎,傻馬話好味~

當然唔少得長腳蟹喇...傻馬唔係食咗好多,因為有好多其他好味o既...生果有日本溫室蜜瓜,西瓜,荔枝,西柚,葡萄...超正~食完今餐,傻魚個六個月魚肚仔變咗七個半月...點算?!!

食飽經過見到...傻馬話好想睇...咪買飛入場囉...

睇一個鍾...好好睇!個個睇到拍爛手掌!

之後喺酒店裏面周圍行下...行到一樓望上去...傻馬話勁似千與千尋間澡堂...唔講唔覺,又真係好鬼似喎...返到房,傻馬即刻放咗一缸水o黎浸...點解?因為呢間酒店將啲天然溫泉水引入每一間房.所以就算唔去大浴場或露天溫泉浸,都可以喺自己間房個浴缸度浸溫泉.啱晒懶怕羞又唔鍾意同人迫o既傻魚...傻魚諗緊聽朝好唔好五點起身上去頂樓露天浸一浸...今晚間房幾錢?承惠二萬九千円.物有所值,唔貴~