豪華遊(一)

由於要一早六點幾出門口,所以成晚冇瞓...咁早去邊玩?

七點十二分,喺新宿上咗呢架電車...兩個鍾後...

九點零八分,到咗!咪就係日光囉...傻馬講過好多次話想o黎...今次三連休咪近近地囉...

o黎到日光就梗係要去東照宮行下喇...記得十年前o黎嗰陣都仲見到啲野猿周街走問人拎嘢食...今次就半隻都見唔到...行咗好耐,又上又落幾千級樓梯...(傻馬:「大隻講...邊有幾千級咁多呀...得嗰幾百級咋...啲阿婆都仲行得快過傻魚呀...唉~」)再加上尋晚冇瞓,好攰呀!!!

傻魚叫咗個冷麵套餐...

傻馬:「天寒地凍,梗係食熱嘢o架喇...」

食完等車嗰陣見到呢架巴士...聽日去忍者村嗰陣搭呢架去~

見巴士未o黎,口痕買咗件食...傻馬:「傻魚好似啱啱食完晏咋喎...」

兩點幾,行到冇地方好行,天氣又凍,都係早啲去酒店吧喇...哈~唔使等到三點,即刻拎到鎖匙入房...

間房唔算大...個餐枱好鬼多餘...

閣樓又有兩張床...兩條友點瞓四張床呀?!!瞓邊好呢?

見唔見個玻璃門呀?出面係個庭園仔,有個私家露天溫泉o架~可以唔使同其他人迫,鍾意幾時浸,浸幾耐都得...

間房好光猛...

因為早到,仲未有其他住客,傻馬同傻魚走咗去酒店個大露天浴場影相...

傻馬企呢個位後面係圍欄,隔離就係傻魚間房個小庭園喇...

好熱下...呢個係最大嗰個...男湯都有個木造o既圓風侶,不過細啲...之後傻魚返房走咗去個私家溫泉度浸...可能係露天加埋天氣凍o既關係,水溫唔係太熱...大概三十四,五倒...啱晒傻魚...而傻馬就去個男湯度浸...好熱...應該有四十幾度...傻馬浸得好開心...傻魚浸咗十幾分鍾就返入房.望下個鍾...三點幾...望下出面,見到有其他住客...即刻走去搵傻馬.傻馬知有其他住客到咗,即刻返房...跟住兩條友都好攰,就瞓咗一陣.瞓醒夠鍾食晚餐...自助餐.

人都未坐低,個侍應哥哥就拎住支香檳同傻馬講係酒店送o既,問要即刻飲定拎返房...拎返房飲要自己開喎...咁梗即飲好喇...

食食下,又有另一個侍應姐姐擺低兩件蛋糕,話係酒店送o既聖誕蛋糕...咁多嘢送,真好~

自助餐有乜食?都係嗰啲,冇乜特別...不過傻馬見到啲長腳蟹同螺,開心到差啲成盤抬返枱度食...食飽飽,又返房浸過...傻馬係咁加熱泉水,搞到傻魚差啲頂唔順...今晚間酒店幾錢?承惠三萬五千三百円...都唔算貴...

後記:帶埋部腦出遊,諗住即晚報導o架嘛...點知呢間酒店太山卡啦,竟然收唔到冇訊號喎...唔止個無線上網冇訊號,連電話都圈外呀!搞到個電話因為要不斷搵網絡而筋疲力竭,冇晒電...