明治神宮

今朝一起身就收到個壞消息,個心即刻沉一沉...同當事人傾咗一陣,見對方都好堅強...雖然都仲係有啲唔係咁放心,但係唔想煩住人所以就照原定計劃約網友媽咪同小朋友去玩.十一點九喺原宿站月台會合網友媽咪之後,就搵個地方醫下肚仔喇.去到原宿梗係要去食下蛋包飯喇~咁啱網友媽咪又同傻魚一樣勁愛蛋包飯,就介紹網友媽咪去嗰間有名o既地下舖.因為要落樓梯,所以傻魚抱起小朋友等網友媽咪收車抬落樓.可能見咗好多次,小朋友唔再見唔到媽咪就喊.

傻魚個蛋包飯...好好味...網友媽咪叫咗個兩色汁蛋包飯,一路食一路話好味!見網友媽咪食得咁開心,傻魚都好開心...不過最開心o既係小朋友,乜都有份食...食完就起程去明治神宮,順便去睇紅葉...

上網睇又話依家睇係最靚...都係綠多過紅...明治神宮入口附近呢個位已經係最靚o架喇...去到神殿附近,見到個聖水洗手位.傻魚帶小朋友去玩咗一陣水,跟住就抱住小朋友入神殿...周圍梯級多,推唔到車仔,所以網友媽咪負責抬車...網友媽咪入去神宮參拜完之後買咗個護身符畀小朋友...跟住行咗一圈出返車站附近,小朋友已經攰到瞓咗.去"史恕狗城"行咗一陣,再帶網友媽咪轉戰"吉蒂貓地".網友媽咪好開心周圍睇,傻魚就負責推車仔...行行下小朋友醒咗,見網友媽咪要去畀錢,咁傻魚就拐走小朋友四周圍去篤毛公仔啲鼻仔...哈哈~小朋友篤隻黑豬鼻篤得好開心...買完嘢就去搵個地方坐下飲下嘢,順便喂小朋友飲奶.

網友媽咪個下午茶...

傻魚個下午茶...小朋友飲緊奶見到呢兩碟蛋糕,即刻想奶都唔飲食埋一份...結果等埋小朋友飲埋啲奶至一齊食...之前個蛋包飯都仲未消化晒...好在有小朋友幫口食幾啖...食完坐一陣就起程返歸喇...今日又玩得好開心~

臨走喺車站出面影o既...同網友媽咪和小朋友分開之後,傻魚走咗去新宿蕩...之後去幫關生訂位...

去間餐廳途中見到幾靚,個天又仲未黑齊,即刻影返張先...去到餐廳諗住訂位,點知...間餐廳休三十一同一號!!!點算?關生,再幫你搵第二間囉...無計...勁無癮行返傻家,途經超市買咗啲炸物...

懶...再加冇心機...求其煲咗個雞釜飯就算...今日心情大上大落...聽日...心情好啲o既話會去上野買大餃子...

後記:見身邊o既人唔開心,傻魚都好唔開心...想喊又喊唔出...好辛苦~點樣至可以令身邊o既人開心啲?又怕煩到人喎...諗諗計先...