小午餐會

今日傻魚超開心~好少見到天晴會咁開心...冇雨,咁網友媽咪可以帶小朋友o黎傻家玩囉.11點幾,傻魚去車站接網友媽咪同小朋友,跟住順便去咗附近間一百円食品店買少少嘢.網友媽咪一入間店就好興奮,轉咗一圈買咗少少嘢...如果網友媽咪冇帶小朋友,肯定會大量入貨...之後經過間韓國小食店,網友媽咪一見到就好開心,仲買咗包韓國小食返傻家食.今日喺傻家開餐,所以帶網友媽咪同小朋友返到傻家之後,傻魚就開始煮飯仔.粗茶淡飯,真係招呼唔到.小朋友o黎到新地方,好奇周圍發掘新事物.等埋網友甲君放學返屋企擺低啲嘢過o黎傻家,三大一細開餐喇...

早幾日網友甲君話出街喺間上海舖飲咗碗超難食日式酸辣湯,搞到好想飲正宗酸辣湯同埋好掛住香港啲煲仔飯...咁傻魚今日就獻醜整咗酸辣湯同冬菇雞煲飯.網友媽咪同網友甲君好畀面,猛話好食,氹得傻魚好鬼開心~冬菇雞煲飯...冇影到相...係冇人記得要影相...可能大家都好肚餓啩...小朋友見有嘢食,唔理係酸係辣都照食,仲食得好開心添...

食飽同小朋友玩下,傾下偈,話咁快又到三點幾...小朋友扭眼瞓,咁傻魚同網友甲君就送網友媽咪同小朋友去車站,跟住一齊去超市買餸,然後一齊返傻家.睇完兩集蘇絲黃,網友甲君夠鍾返屋企煮飯仔.個酸辣湯飲咗一半,網友甲君帶咗啲返去飲...呢碗係最後一碗,呢個時候至記得影...

今日真係勁開心...希望冇嚇親小朋友喇~聽日約咗新朋友同囝囝去動物園...呢個星期好多節目,好開心...呵呵~