聖誕派對

今日好忙...一早起身執完嘢就整早餐,食完就拎住一袋二袋出發去睇紅葉...去駅途中見到...

呢隻貓好有型咁坐咗喺度...行前去一睇,原來佢坐喺度用隻手仔按住片枯葉...好可愛~

塊葉畀風吹走咗,隻貓追咗兩步,見傻馬拎個相機出o黎,即刻擺個靚樣先...完全唔驚人,行到好埋都唔會走...

去到神宮外苑...冇喇...今日係銀杏祭最後一日...

行到盡頭望返轉頭,好彩都仲有啲睇下...

之後見到一棵好紅o既紅葉,傻馬起勢影...行多一陣就搭車去渋谷.見時間仲早,就四周圍行下,跟住打畀網友太太約埋一齊去泰國餐廳...去泰國餐廳做乜?日本港太大聯盟搞聖誕派對呀!!!今日有廿七個大人,三個細路參加.先o黎個自我介紹,跟住就拎嘢飲,然後就...

食咗乜?冇影到...都係因為傻馬辦事不力,完全唔記得要影食物...希望有份出席o既網友可以喺各自o既網誌度放啲食物相喇...食到咁上下就開始玩"兵高"遊戲,跟住就開始抽獎交換禮物喇...食埋個甜品,網友媽咪一家就要走先,因為小朋友扭眼瞓...話咁快就三個鍾,希望今次大家玩得開心同識到新朋友.如有需要改善o既地方,請話聲畀傻魚知.下次...幾時再搞好呢?!!