勁白痴~

尋晚有人請食飯...八點喺新宿會合完毛毛大佬同兩位舊同事之後,諗住去食刺身...點知其中一位舊同事話帶傻魚去食啲好嘢.傻魚梗係唔客氣喇~結果去咗一間高檔和食店,啲店員全部着和服,九十度鞠躬迎接傻魚一行四人.若果早知去啲咁高檔o既地方,傻魚一定唔會着牛記笠記咁"居酒屋樣"...

間舖有幾層,每層都係一張六人枱,一張四人枱同一排吧枱.每層都有個專人喺吧枱前面煎煎炸炸...每張枱都有一位和服姐姐為客人斟茶遞水,好好服務.傻魚坐嗰層得一枱七人客,半數係紅鬚綠眼,全部西裝友...搞到傻魚好似格格不入咁...毛毛大佬問傻魚食唔食懷石料理,傻魚睇一睇個價錢...嘩嘩嘩~雖說有人請,都唔好咁樣食咗人隻車o架...揀咗一輪之後,決定叫個普通套餐,位位九千五百円.毛毛大佬梗係開公數當接待喇.啲食物係食完一樣清完枱至上另一樣,樣樣都好好味.冇影相,因為嗰個場合真係非常唔適宜拎部相機出o黎影...毛毛大佬個胃唔多舒服,所以將佢嗰份炸物畀咗傻魚食,結果搞到傻魚飽到上心口.有傾有笑好快就過咗兩個幾鍾.兩位舊同事走下場,而傻魚就同毛毛大佬就一齊搭電車.原本諗住行返傻家,但係尋晚實在太凍,而傻魚又懶醒着咗件薄衫...咁樣行返去一定會凍親,所以都係搭一個站喇...下星期又有人請食飯,咁食法仲唔肥死?!!

今日...冇出街...因為前幾日上網買咗張新床褥,寫明要今日兩點至四點送o黎.朝早瞓醒就收起晒啲床舖,跟住一口氣洗晒啲衫同床單,然後睇下電視,上下網...等到差唔多五點鍾,張床褥都仲未到...奇怪~即刻開返封電郵o黎睇...冇錯呀...係落咗星期四,兩點至四點呀.點解仲未送o黎o既...等多半個鍾...會唔會o黎過以為冇人走咗呀...即刻落去睇下個信箱...冇紙仔呀...即係冇o黎過喇.再開返封電郵o黎睇...睇完一條傻魚勁喺度笑...原來唔係今日,係下個星期四...真係超級勁白痴呀~!!!咁就浪費咗一日...

白痴傻魚晚餐食乜好?諗起仲有半個冬瓜,仲有前日同網友甲君一齊去買o既炸雞...

諗住留返一半冬瓜下次至整...到最後都係落晒啲冬瓜煲湯飲...飲咗一半,仲有一半點算?留返聽日?都係唔好喇...夜啲飲埋佢算喇...杯朱古力奶,好好味!飲完再買...呵呵~聽日去台場幫關生訂餐廳,順便約埋網友媽咪同小朋友一齊去行下.呢個星期好多節目,好開心...