扮闊太

今日例牌神早六點幾起身倒不燃垃圾...之後唔敢返瞓,食咗個早餐就網上會友...吽到十點九出門口,好鬼眼瞓添...約咗網友媽咪,小朋友,網友初春同囝囝去銀座齊齊扮闊太.集合齊人之後,網友初春提議去食自助餐.千幾円任食九十分鍾,低喇...去到見到有一半食物係蛋糕,網友媽咪見到好興奮.最開心係小朋友,有得食又有得玩...今日小朋友好叻,唔見網友媽咪幾次都冇喊過.可能真係同傻魚熟咗,認得傻魚.反而囝囝就唔多理傻魚...可能只係見第兩次,仲唔夠熟...

食飽食滯起程去行街街.諗住同啲細路去睇玩具...但係可能銀座少人帶細路去,所以冇乜玩具睇...見時間仲早,網友媽咪提轉戰錦糸町.傻魚就負責帶路行去東京站搭電車.行行下小朋友攰到瞓咗...見網友初春抱住囝囝咁耐,應該好攰...所以傻魚就氹咗囝囝o黎抱...哈~細路真係易氹...網友媽咪帶路去"玩具細路城"途中經過一個公園.咁啱小朋友瞓醒,三大兩細就喺公園玩咗一陣...去到"玩具細路城",網友媽咪周圍去睇下嘢.咁傻魚就拐走小朋友,拖住小朋友四周圍行.小朋友今日好叻呀!捉住傻魚啲手指行咗成個鍾,完全唔使抱又唔會行行下坐低...小朋友行得好開心...梗係喇...可以想去邊就行去邊,唔使畀人挷喺架車仔度喎...不過之後都係好唔願咁畀人捉上車仔...睇怕唔使幾耐小朋友就唔願坐車會嘈落車喇...

玩到咁上下,話咁快又夠鍾返歸喇...再遲啲要迫車就麻煩...同兩位網友去到秋葉原就各自各轉車.今日好鬼開心!不過好眼瞓...返到傻家附近走咗去"牛牛"入定貨,等聽日傻馬返o黎一齊食大餐!買完抬到死死下...返到傻家傻魚已經冇晒電咁滯...差啲坐坐下瞓鬼埋呀!聽日傻馬返o黎之後,傻魚就唔再需要神咁早起身倒垃圾喇~坐咗一陣叉返少少電,跟住就煮飯仔喇...

快靚正,咁又一餐...食埋呢餐,傻魚就唔使一條魚喊住食喇...咁大條魚,第一次晚晚一條魚食飯食足個幾月...真係好唔習慣,唔想再有下次...依家個雪櫃...爆到差啲關唔埋...恐怖~今日...掛住玩細路,帶咗相機但係完全唔記得要影相...哈~