今日約咗新朋友網友初春同囝囝去上野搵熊貓.一早六點幾起身揼咗不燃之後唔敢返瞓,食埋個早餐然後勁睇電視.十點幾出門口,去到上野啱啱好十一點.同網友初春會合完就食個早午餐.囝囝好玩得,又唔怕陌生.去到餐廳一坐低,囝囝係咁捉住傻魚啲手指o黎玩.嗌咗個甜品-心太軟跟餐...可惜個心太硬,冇嘢流出o黎,搞到網友初春同傻魚好失望.食完就帶囝囝去動物園玩.
途經公園見到紅葉,梗係即影要o黎交功課喇.網友初春有多一張入場卷益傻魚,真係多謝晒~網友初春去換入場卷嗰陣擺低囝囝畀傻魚,囝囝肯畀傻魚抱喎...完全唔似係第一次見呀~傻金魚婆勁開心!
喺動物園裏面都見到紅葉...
周圍都成地枯葉...唔見啲熊貓,唔知搬咗去邊...網友初春話上次o黎見唔到長頸鹿,今次終於見到所以好開心.之後去到某處可以同小動物近距離接觸o既地方,排隊入去抱土撥鼠.囝囝抱住隻鼠鼠猛話好得意.跟住過隔離摸下白兔仔,又玩下白老鼠仔,囝囝玩到唔願走...行出去見到好多山羊同綿羊,有好多小朋友係咁追住啲羊羊.囝囝都唔執輸,摸摸山羊仔.囝囝睇動物睇得好開心,大人傾偈傾得仲開心...
之後行返轉頭離開動物園,囝囝可能玩到好攰,少少扭計.所以出到去帶囝囝去坐下湯密士火車頭.
呢棵好靚...
臨走帶網友初春去買大閘蟹.去到上野就梗係要去買好味大餃子喇.上次同傻馬姨去嗰陣買唔到,勁唔開心...今次...本日休業...又o黎?!!勁失望呀~係喎...上次同傻馬姨都係星期三去...下次記住唔好喺星期三去...
今日玩得好開心.今朝太早起身,所以不停係咁放蚊,真係失禮晒.今晚約咗毛毛大佬食大餐...終於有一日唔使一條魚食飯喇~毛毛大佬話請魚食剌身,發逹喇~嘻嘻~
沒有留言:
發佈留言