しゃぶしゃぶ

尋日收咗張新床褥之後就開始拆箱,跟住抬入房擺低,舖張電毯喺面,然後再舖張毛毛毯喺上面...擺埋啲枕頭同羽絨被,跟住拆埋個紙皮箱...整完成個人散晒...睇睇個時間,傻馬差唔多返到,即刻開工洗洗洗,切切切...仲差少少就搞掂之際,收到傻馬個求救電話叫傻魚出去車站幫手拉行李...即刻洗手換衫跑出去...返到傻家...又餓又冇電...等傻馬休息一陣就開餐...未試過七點就食完晚餐...上一陣網,沖個靚涼,十一點都唔夠兩條傻嘢已經攰到暈咗...好耐都冇試過咁早瞓...

今朝九點前彈咗起身,見傻馬食緊早餐...咁晏都仲未出門口返工?!!傻馬話今日唔使咁早喎...九點幾傻馬返工後,傻魚食完個早餐就上網.十點幾收到傻馬個電話話已經放咗工...吓?!!咁早?!!原來今日傻馬係唔使返工,不過老細唔記得講...唔緊要...返公司蒲一蒲頭,擺低啲單畀會計部,跟住見下啲同事就走人喇.咁啱傻魚今日約咗網友媽咪同小朋友去六本木,所以就早啲去搵傻馬先...之後一齊等埋網友媽咪同小朋友,然後一齊去食晏...食咗乜?和幸炸豬扒飯...掛住同小朋友玩,唔記得影相添...食完去行下街仔...小朋友自從上次喺"玩具細路城"同傻魚一齊行完之後,鍾意咗自己行唔肯坐車...傻魚又拉住小朋友等小朋友自己行下...小朋友開心到四周圍行,四周圍摸嘢,仲行得好快添...網友媽咪拎部相機出o黎影低畀小朋友爸爸睇...諗住畀小朋友行一陣就算,點知一擺小朋友落架車,小朋友就喊...哈~傻魚咪由小朋友捉住手指慢慢行囉...行到咁上下,見小朋友有啲攰就即刻擺上車...唔喊喎...得咗!網友媽咪,真係對唔住呀!搞到小朋友唔肯坐車添...希望小朋友知道,見到傻魚姐姐至可以落車行...如果唔係,網友媽咪就有難喇...行咗一陣,見喺六本木買唔到嘢,就同網友媽咪散會,各自各再戰第二度...同傻馬去咗新宿買禮物,跟住行返傻家途經超市買咗少少嘢就返歸喇...

尋晚食凈咁多嘢,今日點處置好呢?諗咗好耐都諗唔到...頭都痛埋...

索性又一煲過,しゃぶしゃぶ算喇!可惜個鍋細,傻馬又話要拎個煤氣爐仔出o黎麻鬼煩喎...咁傻魚咪煲住啲菜烚起啲肉先,跟住就一碟熟肉同一鍋菜分開上.都仲有三份一凈...聽日又點整好?唔諗住喇...好頭痛呀!!!

今日喺超市買嘢嗰陣,傻馬見到有酒賣就話想買啲果酒o黎飲...結果就買咗呢兩支酒,依家開咗支檸檬酒飲緊...有檸檬味,好好飲~聽日開埋支番茄酒試下先...