三人派對

今朝不停係咁搵嘢執,死唔願換衫出門口...可能係唔想接受就o黎要走o既事實...可惜,不走不走還需走...磨到三點幾終於都係要出去...去邊?咪係去新宿南口買機票返香港囉...買完個心真係好沉...一切已經塵埃落定,下個月開始傻馬又要過返日日食即食垃圾o既悲慘日子...諗起都心痛...
買完機票之後就行去伊勢丹買芝士同羊仔肉.企咗喺度望住啲羊仔肉,唔知買幾多好...結果就買咗四支骨試下.今日咁好餸係因為約咗網友甲君上o黎傻家食飯.

三人派對,好似整得太多意粉...個燒羊仔傻魚照住指示o黎整,不過網友甲君話太生,淨係食咗一啖咁多...下次要整熟啲至得...咁多嘢食,梗係食唔晒喇...淨返少少意粉畀傻魚聽日晏晝食,同埋食淨一塊雞扒留返聽晚.
網友甲君帶咗支紅酒上o黎諗住同傻魚飲,可惜傻家冇開瓶器...

好在傻魚今日買咗支香檳啫...呢支"果汁酒"係為傻馬而買,好甜好易入口.傻馬飲咗幾啖,基本上成支酒係傻魚同網友甲君飲晒...網友甲君嗰支紅酒就留返聽晚用o黎配牛扒...哈~聽晚傻家又有飯局,仲要係網友甲君會親自下廚整牛扒!今次傻馬有食神喇~嘻!