今朝突然收到網友主婦電話,問傻魚今日有乜搞...咁啱傻馬今日冇街去,咁傻魚就話好得閒.網友主婦問傻魚去唔去網友靚仔媽度玩;留喺傻家咁無聊,傻魚梗係話去喇.收咗線之後問傻馬去唔去,傻馬例牌咦咦哦哦唔知想點...終於等到個答案話想去書店睇下書,傻魚就問傻馬想食乜,諗住整埋畀傻馬食至出門口.傻馬又係咦咦哦哦諗一輪,結果係想食麵.乍乍林煮兩個麵,陪傻馬食埋就出門口.去到新宿收到網友主婦電話問傻魚喺邊,原來成村人等傻魚食晏...真係唔好意思呀!
去餐廳會合大家之後就返網友靚仔媽度傾下偈.係咁傾係咁笑,唔覺唔覺又到八點幾.網友人類話夠鍾要走,傻魚又應承咗會同傻馬一齊食晚飯,而網友主婦同網友靚仔媽一家出街食飯,咁就一齊一架車去駅.喺月台度等車嗰陣諗住打個電話畀傻馬,點知原來個電話冇電.好在網友人類喺度,借咗個手機畀傻魚咋.約咗傻馬喺新宿等,仲諗住去買啲嘢返傻家煮...點知見到傻馬拎住成袋寿司呀,刺身呀,漢堡包呀咁...傻馬有咁多嘢食,仲使鬼煮咩...傻魚走咗去便利店買個便當,然後同傻馬一齊返傻家食晚餐.今晚又係便當日...哈~
沒有留言:
發佈留言