雀局

今朝又好早起身,因為約咗網友靚仔媽一家,網友新媽兩母子同網友甲君去飲茶.係!冇錯!係去茶樓飲茶!仲要係放題...傻馬神咁早沖咗出去剪頭髮,返到o黎已經夠鍾出門口.去到惠比寿駅月台會合網友新媽同小吉,然後一齊轉車去六本木.去到茶樓見到網友靚仔媽一家,坐低嗌點心食住等網友甲君.傻魚擺咗個烏龍,尋日通知網友甲君嗰陣講錯咗間茶樓個名...明明係香港茶楼,但係就講咗九龍飯店...好在六本木得一間茶樓啫...

啲燒賣唔錯...

有傻馬飲茶必食o既至愛,咸水角!呢度至好味係啲牛根,今次食咗七籠...(唔知有冇計錯數,因為傻魚冇食...)
食食下網友新媽手痕話想開枱,所以食完就去網友靚仔媽度開雀局.靚仔爸,網友甲君,網友新媽同傻馬就開枱,網友靚仔媽,傻魚就同小吉,靚仔玩.打咗都好耐下,傻馬見電視播奧運,小吉又瞓咗,就叫傻魚打...跟住傻魚就鬧咗兩次笑話...其實傻魚係唔識打麻雀o既...加上早起身,少少眼瞓,所以就反應慢...其他人打得好快,傻魚睇唔切牌.話說阿靚仔爸上家網友新媽打咗隻牌係傻魚想踫o既...但係當傻魚嗌碰o既時候,靚仔爸已經摸咗牌喎...搞到傻魚有啲猶豫,所以叫碰叫得好細聲.說時遲那時快,靚仔爸自摸單吊四筒喎...仲要係清一色!好在網友甲君聽到傻魚嗌碰,截住靚仔爸啫...激到靚仔爸死死下...之後打打下又歷史重演...又係靚仔爸喺傻魚好細聲嗌碰o既時候摸咗牌,傻魚諗住如果冇人聽到就算喇...點知阿靚仔爸聽到喎...好在今次靚仔爸唔係反牌食胡啫...其他人就狂笑,話傻魚嗌完碰之後完全冇反應又冇動作同意欲伸手出去拎隻麻雀返o黎...咁傻魚唔知原來有人嗌碰,就算摸咗牌睇埋都要擺返去畀人碰.睇怕阿靚仔爸下次都唔會搵傻魚打牌.
四圈都打咗好耐下.傻馬傻魚一家輸三家...之後靚仔爸開班教打台灣牌,傻魚就閃去同靚仔玩.打完冇幾耐,網友新媽老公就o黎接網友新媽同小吉走.小吉真係非常可愛,希望好快又可以再見.

喺網友靚仔媽度偷咗張小吉o既相...係咪好可愛,好似小吉呢...
打咗一陣機,少少肚餓添...晚餐點算呢?網友靚仔媽就提議去食扒,五大一細就即刻起程去食飯.

呢間應該係連鎖店.喺門口貼咗張紙,例咗十條規則...應該冇人會睇,多鬼餘...

傻馬個牛扒...

傻魚個雞扒配焗白汁海鮮通粉,好味...食飽傾到唔願走,係咁不停想當年有乜紅歌手靚歌...見時候都唔早,靚仔爸就兜去車站擺低網友甲君,傻馬同傻魚.今日真係由朝玩到黑,好鬼盡興,好好玩~聽日又係要神咁早起身...好鬼眼瞓呀!!!
後記: 好掛住點心想飲茶o既朋友,可以去 http://www.roppongihills.com/jp/shops_restaurants/details/restaurant.php?id=202550005 試下.當然冇香港啲茶樓咁多種類,但係都唔錯o架...