購物狂

今日傻魚做咗購物狂...傻馬前日叫傻魚去書店睇下乜書想買,咁啱尋日落大雨出唔到街冇去到.今日見咁好太陽,雖然唔係好想出街,但係費時又畀傻馬話傻魚喺傻家吽臭,所以就搭一個站去大書店嘆冷氣.逛咗幾層,搵咗幾本書,抄低啲書名同價錢,然後落去睇雜誌.睇下睇下就拎咗四本雜誌去畀錢...(汗)見時候都唔早,條街又冇咁曬,咪行返傻家囉.途中走咗入"要你苦惱"買咗三件衫,走咗去藥房買洗頭水同維他命丸,然後去超市買餸...
嗰四本雜誌已經重到想死,去到超市見到啲菠蘿同洋蔥咁平,又唔低得買返啲...跟住見到啲桃平,買...西蘭花同翠玉瓜都幾平,又買...有牛油喎,買!!!嘩~通菜呀!買...水菜傻馬鍾意食,買...傻家冇晒番茄,雞肉同麵包,買返啲先...啊~腸仔都好似食晒喇,買...買下買下,買咗幾廿磅...加埋啲雜誌,又冇驅車,真係有搭的士o既衝動...抬到隻嘢咁,個天又好陰,好似隨時會落雨咁,個心係咁不斷咒罵點解仲未見傻家...入到屋傻魚已經唔係一條魚,係一隻濕水雞...呢隻"傻雞"氣都未抖完,又要煲定飯,醃定雞,執下個雪櫃質晒啲嘢入去...氣來氣喘o既"傻雞"梗係唔會咁搵笨整大餐喇...

煎咗兩個荷包蛋,個黃係生o架!幾驚失手呀...個咖哩加咗少少夏野菜去煮.唔記得買茄子,如果唔係仲正.不過,好在冇買茄子,如果唔係真係會搭兩分鍾的士返傻家...