又係西餐

尋晚食淨一碗飯,今日晏晝整咗個炒飯...

好耐冇炒飯,好好味呀!!!
喺傻家攤咗好耐,唔知做乜好...諗下晚餐食乜好,諗下煲唔煲湯...唔係喎...傻馬話要飲前日支香檳,咁傻魚又應承整牛扒畀傻馬食...仲好...慳返唔使煲湯煲飯...咁得閒,都係早啲驅車去新宿買香檳...咁啱見到有鮮大扇貝,即刻買...間嘢有正牛扒,都係去返"牛牛"買穩陣...點知去到"牛牛"唔見有上次網友甲君介紹過好正o既國產牛扒...又唔想買澳洲西冷,三塊太多食唔晒...咁點算好?咦?!!國產カルビステーキ...好似幾好味咁喎...好喇~就佢喇...

啲肉碎買咗兩日,唔食唔得...見有芽菜,就芽菜肉碎炒意粉喇...個牛扒都幾厚下,傻魚已經煎耐少少,可惜都仲係血淋淋...好在傻馬都照食...個沙津係尋日包生春卷啲剩餘物資,加啲椰菜絲又一味喇...

傻魚就食埋啲雞塊,費時又喂飽個臭垃圾桶...一邊食一邊飲香檳,近排好似食西餐多...

飯後果有小巨峰,都幾甜...聽晚食中餐,煲返煲湯先...又係時候要開始清雪櫃喇~