打風食海鮮

今日打風...落一陣雨仔,停一陣之後又落大雨...原本傻馬諗住帶傻魚"出海",見咁o既情況唯有改期喇...兩條傻友留喺傻家望雨.今晚其實有煙花睇,不過咁o既天氣都唔知會唔會取消...費時去到落大雨,又要淋住走...
咁得閒做乜好?傻魚倒晒成個衣櫃o既嘢出o黎再執返入去.懶咗咁耐,終於都將啲冬裝收入櫃低...哈~夏天都就o黎過,依家至執冬裝,傻魚真係懶到出汁...之後諗住去買餸煮飯,但係傻馬就話想出街食,順便去書店買書...仲好~慳返唔使"焗汗"!
咁o既天氣梗係唔會驅車去喇...傻馬好唔願咁同傻魚一齊行去新宿南口買書.買完去超市執平刺身同生果,跟住就去搵食...去咗一間傻馬想食好耐o既海鮮丼店.呢間店位於歌舞伎町裡面,都幾多人幫襯...

傻馬必食o既海膽配蔥多羅...啲海膽好味到傻馬唔捨得食...

傻魚今日個腸胃唔係咁舒服,所以叫咗個炙三文魚.唔知係咪肚餓得滯,覺得好好味...
食完行出間舖,竟然落緊大雨喎...都冇計o架...照行囉...行到去"企鵝仔",即刻沖入去避下雨...入到去又點會唔買嘢o架...買完出去啲雨停咗,快步行返傻家...幾驚行行下又落雨呀...聽日會"出海"...去邊個海?聽晚咪知囉~嘻嘻!