大熱天

今日約咗網友甲君去海浜幕張行街街.十點幾出門口嗰陣已經感覺到啲熱氣...去到海浜幕張,個太陽喺正個頭頂,熱到爆!!!行咗一陣就去搵嘢食.去咗食東南亞美食放題...又放題...近排好似成日都食放題咁...食完再繼續行,路經啲冇頂遮蔭o既地方,啲太陽曬落o黎啲皮膚度係刺痛o架...轉咗個圈,熱得滯冇乜心機加上冇乜心水嘢買,就決定返歸喇.
返到新宿傻魚走咗去撳完錢之後同網友甲君一齊去買餸,然後去"兜巴星"坐低飲杯嘢抖下.見差唔多時間就行返傻家,途中竟然開始落毛毛雨喎...頂!今朝睇天氣預測都冇話會落雨,咁傻魚咪洗衫晾出露台囉...快步行返傻家,入屋沖出露台收衫嗰陣又冇雨喎...吹漲!!!不過,好在啲衫冇濕到啫...
煲落個湯,摷下個雪櫃...搵到喇...叫奶奶買o既金針,今日終於出場喇...網友甲君介紹傻魚買o既大帶子點整好?傻馬鍾食蒜茸喎...

好豐富o既三餸一湯.傻馬好快咁清鬼咗個蒸雞,然後慢慢嘆個帶子.個帶子真係鮮甜到乜調味料都唔使落都好味到爆呀!好在用粉絲隔住啲蒜茸,啲粉絲吸晒啲蒜茸味啫...如果唔係就嘥咗個帶子.
傻馬:「個雞好好味呀!!!個帶子仲好味呀~幾時再整呀?」
傻魚:「傻馬咁鍾意食,過幾日再整囉...」
傻馬:「好嘢!!!」
開心死呀!!!呵呵~