狂笑

今日約咗網友甲君,網友靚仔媽同靚仔去新宿食放題...不過尋晚傻馬話今日會去做再入國,問傻魚使唔使做...畀傻馬咁樣問一問,傻魚即刻望下個簽證...哎呀~原來個簽證過咗期傻魚至返東京呀!所以今朝神咁早就起程去入管更新個簽證.唔知會搞幾耐,所以就打畀網友靚仔媽改晏啲食.
仲諗住會有排等,帶埋部"任癲狂"同買咗個包諗住慢慢嘆...去到畀啲文件個姐姐睇嗰陣畀個姐仔寸...「今次破例接受你個申請,下次記住要到期前兩個月內至接受更新申請o架...」傻魚即刻解釋係因為傻魚會返香港兩個半月,所以要提早申請.個姐仔夜依然好寸咁話:「總之今次係例外,下次要到期前兩個月內至可以o黎續證!」傻魚連聲話知道,跟住就搵個靚位坐低食包.個包都仲未食完,已經叫到傻魚前一個號碼.乍乍林吞埋口包,收返埋剩返嗰啲,就聽到廣播叫傻魚個號碼...畀晒啲嘢靚女姐姐,填埋個地址,問埋兩個問題...由行入入管開始計時,前後加埋十五分鍾就搞完...搞錯呀?又會快得咁緊要o既...仲有咁多時間,傻魚蕩去邊好呀?即刻打畀傻馬,通知傻馬今日好少人好快.然後搵個靚位食埋個包,嘆下茶...之後慢條斯理去搭巴士返品川,喺書度立読,再搭電車返新宿...出咗閘突然畀人嗌住...原來係網友靚仔媽同靚仔...通知咗網友甲君之後,就直上八樓排隊等位.
今日條隊好長,但係就等咗唔夠一個鍾...算快o架喇...個個搏晒命係咁狂食,個個食到飽到上心口...食食下阿靚仔突然狂笑,仲笑咗好耐添...原來係覺得三個女人係咁不停講嘢好搞笑喎...食飽就去行街街...靚仔行到唔願返屋企.結果傻魚就同靚仔約定聽日再見,靚仔至肯返屋企.
返到傻家即刻煲飯,然後開始切嘢.傻馬七點返到,七點半就開飯喇...

今日晏晝食得咁飽,梗係唔整咁多嘢喇...主要係整畀傻馬食,傻魚只係陪食咗幾啖...

早幾日買o既海葡萄,傻馬食得好開心...聽日傻馬要返個客度,十一點到八點,返到傻家都成九點半...聽日傻魚可以去食個下午茶...呵呵呵呵~