飛車

今日傻馬返十一點收八點,今晚可以唔使咁早煮飯仔.原本咗網友甲君,網友靚仔媽同靚仔去食放題,可惜網友甲君唔多舒服,所以改期...咁得閒做乜好?洗衫執屋又做完喇...睇下奧運上下網囉...見今日要去買餸,就搵埋網友甲君一齊去超市.約咗四點幾喺超市買住等...
見仲有一個鍾,即刻飛車出去新宿撳完錢再去幫傻馬買機票.傻馬搭"嘥筆",啲時間係晚機去早機返...畀錢之前順便問下有冇其他航機係早機去晚機返,但係又差唔多價錢o既.阿姐姐撳完一輪機之後,拎住張紙仔同傻魚講..."阿那"淨機票係六萬円,"泰國"就要八萬円,再加埋燃油附加費同機場稅就好貴...咁冇計喇..."嘥筆"囉...返香港十一日,機票就要六萬三千円..."嘥筆"都唔係平得好多啫...
搞完啲機票就驅車去超市.買完餸畀埋錢都仲唔見網友甲君...電話又唔接,唔係喺屋企暈咗下嘛...都係乍乍林去埋"牛牛"買煲湯瘦肉,然後返傻家上網睇下網友甲君有冇留言先...原來網友甲君食完藥眼瞓,瞓鬼咗啫...即刻放心晒...
傻馬九點半返到o黎,等咗一陣就開飯喇...

近排會密密食生春卷...包春卷皮太多喇,食極都仲有,都唔知幾時至得完...o黎緊兩日傻馬會返公司,唔使山長水遠返個客度.咁咪要早啲煮飯囉...
同場加映:

上星期六喺新宿間超市買咗半個蜜瓜,三百円都唔使,好低~臨收舖,所以有啲刺身寿司同生果都會平...啲顏色又鮮艷,仲好鬼甜添...o黎緊個星期六又去買先...