小魔怪大戰大魔魚

今日好早就起咗身,因為今日約咗網友媽咪走之前介紹畀傻魚識o既新朋友,大隻妙去新宿食晏.一時唔記得帶相機,冇影到相添...原本諗住去飲茶放題,但係阿女話唔食中華嘢喎...問阿女想食乜,阿女好細聲咁講:「寿司...」果然識食,唔貴唔揀...結果咪兩大三細拉隊去食寿司囉.食完去行街街,因為大隻妙話自己大鄉里出省,所以一定要盡玩喎...行完新宿東口樓上就轉場去行時代,然後行到好攰就去食下午茶...
同大隻妙一齊四個幾鍾,全程大隻妙都好勞氣...兩隻小魔怪加一個小魔女,吵吵鬧鬧打o黎打去...見大隻妙咁辛苦...好喇~等傻魚幫下手先...跟住就開始咗一場經天動地o既小魔怪大戰大魔魚...真係少啲氣力都唔掂...大隻妙話阿女練仙唔多食嘢.不過以傻魚所見,今日阿女都食咗好多嘢...大隻妙見到都嬲嬲地話要報串...哈~真係搞嘢...
玩到五點幾,大隻妙都仲係唔願返歸...不過傻魚要返傻家煲湯煮飯,又驚大隻妙一拖三逼車辛苦,所以就"焗"大隻妙一齊去搭電車.送咗大隻妙一家上車之後,傻魚就行過隔離月台搭一個站返傻家.途經一百円店,走咗入去買咗兩個香檳杯...返到傻家即刻煲湯同煲飯,然後慢慢抖返順條氣...

尋日買o既牛扒食咗一件,今日食埋另一件.傻馬話好味,下次又多一個選擇喇~今次夠味又夠火喉,五成熟,傻馬猛話好味道!仲要繼續清啲湯料,o黎緊應該晚晚都有靚湯飲~