飯局

今日有飯局,所以好早就起咗身.見個電話冇乜電,即刻叉下先...結果出門口嗰陣唔記得拎返個電話,行到半路醒起,即刻行返轉頭攞返.原本早咗少少出門口變咗遲到添...去到渋谷會合網友靚仔媽,網友初春,網友新媽同小吉,然後去食晏.好耐冇見網友新媽同埋小吉太可愛,開心得滯唔記得影相...食完晏行咗一陣,網友靚仔媽話要去接靚仔放學,所以要走先.之後網友初春又話要走,淨返傻魚同網友新媽兩母子.網友新媽話想去"企鵝仔",所以就轉場去新宿.去到新宿見小吉瞓咗,就去好味蛋糕舖食個下午茶.

呢間嘢之前介紹過o架喇...可以去呢度睇返...呢一季其中一款新蛋糕,鮮雜果蛋糕,正爆!!!個夏日特飲都唔錯.
傾咗一陣偈,諗住去行"企鵝仔",但係考慮到新宿間"企鵝仔"啲貨擺到密密麻麻,又窄人又多,小吉架車仔應該入唔到...結果就去行超市算喇.間超市要落一層至到,淨係得電梯,所以傻魚就抱住小吉等網友新媽拎起架車落電梯.小吉可能瞓夠食飽心情靚,肯畀傻魚抱又同傻魚玩.傻金魚婆就梗係開心到飛起喇.行完超市,網友新媽買咗少少食物畀小吉,然後行返轉頭去駅.途中見到有平嘢執,網友新媽見小吉肯跟傻魚,梗係唔會放過呢個咁難得o既機會.之後送咗網友新媽去月台,傻魚就搭一個站返傻家,途中走咗去"企鵝仔"幫網友新媽買少少嘢.
返到傻家就開始煮飯仔.見傻馬成七點九都仲未返到,傻魚咪慢慢o黎囉.差唔多八點鍾,傻馬氣來氣喘咁沖入屋.傻魚見到咁o既情況,諗住叫傻馬幫幫手,但係傻馬唔睬傻魚喎...結果咪趕唔切睇開幕囉...搞乜咁遲?

臨尾趕住開飯,落少咗啲調味料,所以差啲啲冇咁好味...

就係包呢個生春卷搞到遲晒.點個芝麻醬好正.不過傻馬鍾意個甜辣椒醬多啲.個奧運開幕好長,仲未完...聽朝又要早起,好眼瞓添o架...
後記: 睇完奧運開幕啲煙花,覺得呢排睇嗰啲真係蚊髀同牛髀...