"出海"追鴨記

今朝竟然唔知醒,瞓晏咗...搞到十點幾至出門口.搭一個站去新宿轉臨海線去新木場,再轉京葉線去舞浜...

轉呢架"迪迪車"去...

冇錯!傻馬就係帶傻魚出呢個"迪迪海"...哈哈~(邊有咁富貴真係出大海呀...)

用咗好多好多細細張笑容相砌成o既...好靚!

就係呢隻唐老鴨,追到傻魚氣咳...佢啲毛好鬼滑,傻魚不停係咁抽佢個蘿柚水.嘻~

再追高飛~

米妮姐好"人氣",好多人圍...好在傻魚都有機會同佢影到相...

好靚...有啲熟口熟面...

咦?火山?!!唔理住...肚仔餓...

傻馬個茄子肉醬意粉,普通質素...

傻魚個燒春雞牛扒,再加杯血橙汁...牛扒畀咗傻馬食,個血橙汁好酸...

食飽一行出去就見到...呢隻唔知叫乜...照追...影完就去睇表演...

呢間嘢時不時都會傳出啲恐怖聲,應該係鬼屋...

睇完表演見到兩隻鼠,追~

又追鴨...

呢隻貓...唔夠啲細路勁,影唔到...

呢個米妮...太多人圍,又係影唔到...好失望...

好似澳門威尼斯人...唔怪之得咁熟口熟面喇...噢...烏雲滿蓋喎...

夏日炎炎,至啱玩水...想濕身就記住早啲攞個靚位做濕水雞喇~可惜今日唔係好熱...

為咗呢個杯而買o既紅橙汁冰...好味~

呢個火山好似澳門嗰個...不過呢個火山會噴火o架...唔似澳門嗰個死火山...

你兩隻咁有型,又點可以唔搵你哋影相呀...

夠鍾去呢條船睇表演...

睇睇下開始落雨,結果表演要中止...好掃興呀!!!

傻馬好鍾意呢個景...

越落越密,越落越大...

因為天氣不佳,取消咗兩場盆火舞...

見周街好多人拎住條大毛巾,傻馬又買條"屎滴仔"畀傻魚...

入夜啲燈飾好靚...

好似身處海底...周圍行下睇下嘢,停咗雨喇~好嘢!!!肚餓添...

一人一個咖哩雞...好重香料味...食完行出去搵個靚位先...

今日最後一場盆火舞終於如期喺九點三舉行...人人都情緒高漲~睇完又夠鍾走人喇...

真係唔捨得走...

傻馬臨走前都仲搏命狂影唔願走...今次都唔係影咗好多相.傻馬話可以再o黎多次~太好喇!!!
後記: 八月期間喺"迪迪海"啲舖買滿三千円就會有一張抽獎卡.傻魚抽中三奬,為咗去換奬品,唔見咗條手巾仔...三奬係個米奇頭名牌...原本諗住行返轉頭搵,但係傻馬話買返條畀傻魚喎...好在係條平巾啫...哈~又有條新手巾仔喇...嘻!