北東北之旅(二)-白色除夕在秋田

2009年

新年快樂~

今朝瞓到差唔多八點至起身,乍乍林梳洗完後打咗個電話過去關生間房,同關太講八點半食早餐...等埋傻馬就去樓下間餐廳,原來又係尋晚食嗰間...仲要係喺返同一間房仔...尋晚酒店問要和食定洋食早餐,關生話要和食...結果...

裡面有幾粒雞丸,好味...

關生唔食魚,又益咗傻魚...

呢個豆腐好正!!!

左邊嗰碗仔過咗畀傻馬...

其實有同啲早餐影大合照o架...可惜又係不知所蹤...係"計"怪定黑洞呀?

一路食啲雪就越落越大...好靚~(註:係關生喺度講緊嘢...)

關生有好多嘢唔鍾意食,個和食早餐淨係用味噌湯撈飯同食咗幾粒雞丸...搞錯!!!見關生仲係唔係好掂,今日就遲啲至走囉...酒店最遲可以喺十二點至退房,咪返房盡享間私家露天風呂...

傻馬邊浸邊影...呢個就係露天風呂個景...若然對面啲人有望遠鏡,一定有嘢睇...嘆到十一點幾,執埋啲嘢就落去退房...

駅附近有嚿咁o既嘢...下一站係...

踩多腳先...

大站...

喺地下搵到間酒店o既方向...

經過間土產商店...

再穿過一間商場...

唔使行出街就可以到達酒店...尋日"豪"完,今晚要慳啲...間房都唔算窄,幾乾淨...擺低啲嘢,肚仔餓要搵食...求其喺酒店附近啲商場度撞咗入一間烏冬店...

關生食咗藥回魂有返少少胃口,所以就跟傻馬叫咗呢款烏冬...

傻魚個餐...咦?!!又有炸嘢...哈...

關太碗烏冬...啲烏冬好好味~原來呢間係一間好出名o既烏冬店.喺出面啲物產店都可以買到呢間店o既乾烏冬...真係誤打誤撞又食到餐好o既...呵呵~

食飽就周圍行下...

傻馬想去呢度...

影呢嚿嘢...

同呢嚿嘢...

傻魚見關生仲未係"正常",所以就同關生關太喺呢度等傻馬...傻馬去完秋田公園之後返o黎話好在大家冇跟埋上去,上面凍到震...之後一行四人落一層...

行下個物產店,擺低唔少銀兩...個身"輕"即時咗好多...(汗)

行返出去個天都開始黑喇...經過...

見仲未收就即刻走入去行下...好在去咗,因為聽日唔開...

室內o黎o架...

好多舖已經收咗,未收o既就忙緊收工...

亦有啲乾貨舖繼續做生意...

有啲就想盡最後努力清貨...

行行下見到有個位教人秋田弁,玩咗一陣...

隔離有個魚名漢字牌,又玩咗一陣...幾鬼想拎走呀!當然冇咁做喇...唯有影低囉...

臨走見到箱擺喺吉舖,擬似冇人認領o既蟹...四條友圍住影咗一陣...好搞笑...今晚唔知食乜好...關生又唔係咁舒服,所以就去行超市買嘢返酒店房食算喇...

呢個広島燒好大件...另外買咗幾樣嘢,食完都好飽下...今日冇乜點玩過,影得好少相...希望關生聽日可以完全回魂喇~

北東北之旅(一)-秋田

尋晚一心諗住瞓少少,今朝倒塔咁早起身出遊...點知關生成晚都好嘈,搞到傻魚完全瞓唔到...臨天光關生仲要發冷,係咁震係咁叫...之後仲嘔咗幾次添...臨出門至整單咁o既嘢...仲搞到成屋人冇覺好瞓喎...鬼咩!關生o黎咗東京咁多日,每日都懶有型咁着短袖衫短褲.叫關生着長袖衫,關生死都話唔使...話乜嘢要習慣東京啲凍,咁北上就唔怕凍...令人費解!!!
難得傻馬放假,又買晒飛訂晒酒店,冇理由唔去o架...關生自己都話冇問題,咁咪起程囉...但係就遲咗少少出門口,趕唔切搭原定架新幹線,唯有搭下一架...有多餘時間,唔使咁趕...去到上野駅一人買咗一個便當,去月台食住風等車...
今次由於係超旺季,全日所有車都爆滿,只可以買立席...乜嘢係立席?一般新幹線除咗有指定席之外,仲會有自由席.自由席係平啲,但係好彩o既話都會有位坐.但係今次搭呢架新幹線就冇自由席,不過就有立席...立席係企喺啲廁所走廊位,就算有位都唔可以坐...要企足三個鍾,都幾辛苦!不過冇計喇...

傻魚個便當...企住食,好陰公...

傻馬個便當,都係企住食...

新幹線一路北上,景色開始變成白濛濛一片...好靚~

三個鍾之後,終於到咗第一個目的地...

田沢湖...但係個個都好散下...

駅出面好靚...雖然好凍...由於遲咗一班車,所以錯過咗架觀光巴士...唯有搭另一架,去另一個地方...

呢個唔係海,係一個好大o既湖...就係田沢湖...

真係好靚~

好靚~
關生因為唔係咁舒服,喺間土產店休息咗一陣,然後出去影咗幾張相...之後搭巴士返駅...

呢區好多呢啲面具...
下一站係...

去行小京都...之前,先醫肚...

關太個烏冬...

關生食咗藥,好返啲有返胃口,叫咗個叉燒拉麵...

傻魚個鹽味拉麵...

傻馬個味噌拉麵...

食飽就開始行...行行下開始落雪...傻魚超興奮~呵呵!!!

呢度有好多好舊好有歷史o既建築物...

仲有好傳統日式o既建築物...

好似好好味咁喎...

如果再落大啲雪,一定會更靚...

由天光行到天開始黑...其實都仲係四點咋...行行下關生又話攰又話唔舒服,所以快步行返駅...

搭呢架電車...到達目地o既時候啲雪越落越大...

今晚喺呢度住...間酒店係傻魚堅持要住o既...諗住關生關太屈喺傻家咁多日,又窄又唔放便又冇私隱...人哋新婚,加上啱啱至團聚,應該搵間正酒店畀人哋"甜"下o架嘛...

一上到住嗰層...嘩嘩嘩~

一入房...嘩嘩嘩嘩嘩~

正到爆...傻魚真係大鄉里出城....

最正係呢個浴室...開晒啲窗o既話就變咗一個私家露天風呂...當然啲水係溫泉水喇...
擺低啲嘢,就落去搵食...傻魚仲諗住係包晚餐,原來係傻魚搞錯咗...

都唔緊要,酒店裡面有間平民居食屋...

必叫o既炸雞...

傻魚好愛o既炸魷魚鬚...

傻馬叫o既餐...千幾円,唔貴...

關太個餐...都係千幾円...

關生唔舒服冇乜胃口,傻魚提議關生烏冬...啲天麩羅當然係益傻魚喇...

其實傻魚個餐本身都有天麩羅...

出面落緊雪,個景好靚...忍唔住影咗條片...
關生食咗一半烏冬,傻魚見關生好唔掂,就叫關生同關太早啲返房休息.傻馬同傻魚食嘢比較慢,梗係慢慢嘆下先喇...食完飽到上心口...跟住返房沖完個涼,畀傻馬拉咗落去試岩盤浴...係酒店送o既,原本係關生同傻馬去o架...可惜關生頂唔順瞓鬼咗,傻馬唯有迫傻魚陪傻馬去試囉...冇帶相機,驚"蒸熟"部機,所以冇相睇...
先去拎一袋岩盤浴專用衫,大毛巾同一支水,然後聽個職員講解要做啲乜...有啲房係冇浴室o既,所以會要求顧客先去男或女大浴場沖涼先,然後着上一條綠色o既內褲同套專用衫.每人都會有條鎖匙,連埋個電子卡.去到門口要"嘟"卡,度門至會開...要先去男或女更衣室放低啲嘢,然後拎住條大毛巾入去.一入到去,即刻覺得呼吸困難...頂唔順,九秒九跑返出去...之後再入返去,都係好辛苦...兩條友揀咗個冇咁熱o既位,舖條大毛巾喺中間啲大方石度,跟住就瞓落去...啲大方石四周有好多小黑石圍住,所有o既石都係熱o既...成間房就好似桑拿房咁,又熱又焗...正確o既岩盤浴係要瞓喺度十分鍾,頭頂會有個漏沙計時器,漏晒啲沙就要起身去側邊啲凳度坐下蒸十分鍾,然後再返去瞓低十分鍾...建議每次四十分,有促進新陳代謝同美容o既功效.期間要飲佢提供嗰支水,做完四十分鍾一定要飲晒成支水.傻魚瞓咗幾分鍾就跳起身,蒸咗都唔知有冇兩分鍾就走出去抖氣同飲水...之後又去瞓幾分鍾...出咗好多汗,都幾舒服,但係之後就偏頭痛到爆!!!下次都係咪搞喇...而傻馬就做足四十分鍾,仲話好過癮添...蒸完出去個更衣室度有個"揸姑池",傻魚見冇人玩咗一陣就出去等傻馬...還返個吉袋同拎返房匙之後就返房再浸過...開晒啲窗,慢慢嘆個私家露天風呂...睇住個雪景,望住啲飄雪,正!!!