愛心聖誕大餐

今朝一起身就忙到抽筋...先洗咗一機淺色衫,然後吸塵,執嘢...執執下望下個鍾...嘩~咁快十二點喇...整埋啲手尾換衫驅車去狂掃貨!第一站係一百円店,買咗十四樣嘢...勁~第二站係去"企鵝仔"買奶,零食同少少清潔用品.第三站係去"牛牛"買牛扒.買咗塊千四円o既國產西冷,同四個溫泉蛋.第四站係去超市買雞扒,蔬菜同生果.行咗三個幾鍾,買咗四大袋嘢...真係滴汗中呀~去咗咁多站買嘢,站站都好多人.啲人係買到好似啲嘢唔使錢咁,好恐怖!喺"企鵝仔"買緊嘢嗰陣,傻魚畀個金毛"夜王"捉住問某款意粉要落啲乜材料去煮...好在傻魚都有食過嗰款意粉,答到人啫...
抬住四大袋"貨"返到傻家,即刻又要開工喇...又開多一機洗毛巾,然後開始做手作仔...今次係整兩塊布要o黎舖櫃頂.整咗差唔多成個鍾,先至整完第一塊...見時候都唔早,係時候開始製作今日o既"主角"...整完差啲攰到暈低...
今日o既"主角"咪就係"聖誕大餐"囉!!!先o黎個...

前菜...半價五百円...

沙律...啲菜九十八円一包.番茄仔用咗一半,一百四十四円.啲刺身係個前菜啲頭頭尾尾...

湯包二百九十八円,牛奶八十八円,一條紅蘿蔔三十三円,半個洋蔥十三円,一個薯仔四十七円,幾條紅腸仔五十円,急凍蜆一百円...其實應該係用煙肉,唔記得買所以用腸仔代替...仲應該落椰菜,又係唔記得買所以冇落.不過都幾好味~

主角出場喇...先o黎碟傻魚o既主菜...半個紅椒半個黃椒九十八円,半個西蘭花四十九円,一個薯仔四十七円,五個帶子八十円,國產雞扒三百八十七円.

呢個至係真正o既主角~茨城產西冷牛扒,一千四百円~三成熟,今次冇失手!

配埋個汁一百九十八円,傻馬話好好味!!!真係開心~

喺呢啲咁o既節日又點會冇酒o架...買咗呢支玫瑰(?)香檳八百八十円...不過傻馬覺得唔夠甘口,所以凈係飲咗一杯半.傻魚就覺得都唔錯.
今餐食咗四千五百一十円,都唔平!不過價錢同食乜都係其次,最緊要係個心意同埋係同邊個食.今餐食得好開心,因為傻馬好畀面極速清盤!見到傻馬食得咁開心,今日o既辛勞都係值得o既!今日又再一次覺得,幸福其實係可以好簡單~
後記:其實仲諗住整蛋糕,不過傻馬話好飽,所以聽日至整!嘻~