走青

今日兩條友都瞓到好晏至起身,因為尋晚執嘢執到好夜至瞓.整完餐晏仔,食完之後又開始執下嘢.跟住就開始做手作仔...又係做枱布,因為傻魚想換舊嗰塊出o黎洗.整多塊,咁咪有得替換囉.而傻馬就出去打波.整咗兩個鍾,終於搞掂...咁啱傻馬打o黎話返緊o黎喎...咦?!!唔出街食咪要煮囉...尋日冇整個海鮮鍋,今日可以整喇.叫傻馬順路買磚豆腐返o黎,然後喺雪櫃摷晒啲材料出o黎...

仲大過傻魚個拳頭o既超大生蜆(?)...三個一包,傻馬前日買咗兩包,半價共七百四十八円.真係低食~咁多料傻馬都仲話要煲飯...傻魚咪好聽話,煲咗煲飯囉...

唔知係咪擺得耐死鬼咗,煲極都唔開...搞到其他材料都過熟,最後傻魚唯有用暴力整開佢哋...原本排得好靚o架嘛...不過唔緊要,啲湯好鮮甜好正!食完啲料,裝埋啲飯同拎咗兩個蛋...

整咗個走青雜炊...冇預到傻馬會要求煲飯,所以冇準備到蔥...不過之前切咗啲長蔥擺埋落個鍋,所以啲湯都有啲蔥味...食完好飽!
同場加映:

呢三個就係星期二買o既青森大蘋果.睇下,幾大個...一陣切個o黎食先...呵呵~