一頭煙

拖咗十日,今日終於都捨得去做.諗住一早就去,結果搞下呢樣整下嗰樣,整埋個午餐食埋至甘願出門口.去到入國管理局都已經係兩點半.聽肥叔叔講今日應該少啲人.但係買完印紙上到去一睇...嘩~使唔使咁熱鬧呀?!!埋去飛仔機望下個顯示器,傻魚前面有一百零五個人.拎咗飛仔之後又走返落便利店買雜誌睇.等咗差唔多一個鍾,終於輪到傻魚.
諗住幫傻馬申請埋個再入國,不過傻魚唔可以代辦.原來如果個簽證唔係當日出o既話,係唔接受親人或外人代申請再入國.又知多一樣嘢喇.等就一個鍾,但係一埋櫃檯一分鍾就拎到個再入國.整完即打畀傻馬,話畀傻馬知傻馬要搵日親自o黎整.搭巴士返到品川駅,喺駅裡面見到有枝豆蛋糕卷賣.掙扎咗一陣,結果都係買咗個.之後喺書店磨咗一陣至上車返新宿.
一支箭行去旅行社幫傻馬交機票錢,可惜負責嗰個員工咁啱今日放假,佢個上司o黎跟返啲嘢.話咗係上司就梗係忙啲o架喇.凈係畀錢同拎張行程表都搞咗半個鍾.之後行返去傻家附近o既書店買雜誌.返到傻家成個人散晒.休息咗半個鍾,又夠鍾開工喇...
星期一晚買咗一包平魚仲未整.呢包魚其實係生食用,不過隔咗咁多日都係整熟o黎食好啲.咩魚?鰯(いわし),二百円有六條.好低!

傻魚唔知可以點整,所以又係椒鹽煎.傻馬唔識食有魚骨o既魚,不停話呢啲魚好多骨會哽親.好在啲骨係軟骨,加上煎脆咗,所以傻馬都食到.咁大個人都唔識吐魚骨,成日要人煮之前費盡心機去骨...一兩次就話啫...次次都係咁,邊有咁好心機呀...今次都係求其去咗少少骨就算.煎到成頭煙,成屋都係魚味!!!陰公...好在之前買咗空氣清新珠啫...
個咖哩磚,以往買開中辛,不過今次就買咗辛口.傻馬係嗰啲鍾意食辣,但係又唔食得好辣o既人.今次都驚傻馬食唔到咁辣,但係又得喎...關生,你應該冇問題喇~好快就可以一齊食咖哩喇~嘻!