冇味精,好味~
收到啲嘢之後執埋其他啲嘢,拎住兩袋嘢搭電車去渋谷逛,睇下可唔可以再幫網友媽咪搵齊佢想要o既嘢.行咗一陣,係得一樣搵極都唔見.唯有放棄,打畀網友靚仔媽睇下佢喺邊,幾點得閒.約咗個地點,傻魚就搭電車過去.
好耐冇見靚仔,依然都仲係咁靚仔.傾咗幾句,交咗袋嘢畀靚仔媽轉交畀網友媽咪之後,傻魚都唔打擾靚仔媽返屋企執嘢,所以就搭返電車去渋谷繼續遊蕩.遊到咁上下時間,又遊返去新宿行下.之後去集合地點等網友甲君.
自從網友甲君搬咗之後,傻魚又少咗個朋友仔一齊飲茶買餸.以前住得近,話出就出,都不知幾過癮...前幾日去超市買餸,見到當日有好多平嘢,即刻拎咗個電話出o黎諗住打畀網友甲君.好在停咗一停,諗咗一諗,醒起網友甲君已經搬咗,即時收返埋個電話.嗰刻覺得好搞笑.
見到網友甲君之後就去買嘢,然後點咗傻馬去居酒屋攞位.星期五加埋年尾多忘年會,周圍都爆滿.原本諗住去烚下烚下,都係因為預訂唔到位而被迫轉軚.好耐都冇一齊食飯,雖然唔係食咗好耐,但係都好開心呀!食完送咗網友甲君去車站之後,同傻馬兩條友行咗去"企鵝仔".諗住去買電芯,順便睇下啲香檳...點知睇下又買一樣,再睇下又買多一樣...行到最後兩條友都話要快啲走,再唔走就會出事喇...咁又買咗二千幾円嘢...次次都係咁...真係好弊!!!
沒有留言:
發佈留言