鑊鑊金

真係日日新鮮,鑊鑊金呀~話說今次返香港除咗定期返一返去之外,最主要係幫好友愛麗絲搞婚禮.原定係十月頭擺酒,咁傻魚就喺十一月頭返東京.不過驚趕唔切返東京,所以早咗去續簽證.一心諗住搞掂晒啲嘢,今次冇死喇...點知個婚禮延遲到十一月尾,咁傻魚唯有改期返東京.結果...一時唔記得個再入國十一月中過咗期,今朝就咁返到羽田空港...咁就奶晒嘢喇!!!
行到埋個櫃位,個哥哥仔望下望下,跟住摷下摷下,然後問傻魚係咪仲有本舊護照.傻魚仲懵然不知,摷返本舊護照交畀個哥哥仔.當然係換o黎一句:「小姐,你個再入國過咗期喎!」當堂呆咗幾秒.然後就有人帶傻魚去見個肥叔叔,開始畀人"盤問"點解個再入國過咗期唔續.傻魚差啲喊咗出o黎,忍住啲淚水慢慢解釋畀肥叔叔知.途中多咗個瘦叔叔埋o黎睇熱鬧,仲不斷恐嚇傻魚話個簽證冇咗効,傻魚唔可以入境.真係想打鑊佢!!!而肥叔叔就不斷問傻魚嘢,不斷搵辦法幫傻魚.之然肥叔叔畀咗份六頁紙水蛇春咁長o既問卷要傻魚填,解釋返個情況.其實到咗呢個時候傻魚都仲未知入唔入到境.由於太早o既關係(朝早六點半),傻魚驚傻馬仲未瞓醒,所以就打咗個短訊畀傻馬.傻馬好快就打o黎問乜事.
傻馬知道之後都唔知點算,傾咗一陣見肥叔叔搵傻魚所以收咗線.肥叔叔問傻魚傻馬係咪喺出面等緊傻魚.傻魚話唔係.跟住肥叔叔見傻魚眼濕濕,就問傻魚有冇打畀傻馬.傻魚話打咗,跟住肥叔叔就叫傻魚入去間房仔坐.航空公司個地勤姐姐跟住走入o黎問傻魚個名,話要幫傻魚代收行李.肥叔叔就同傻魚講個簽證取消咗,仲交咗張紙畀傻魚簽名.嗰張係一張入管保留控告傻魚非法入境o既通知.傻魚諗住睇真啲至簽,點知肥叔叔就話唔使睇,張嘢只不過係做個樣啫...係咪o架?!!然後肥叔叔拎返本護照畀傻魚,話之前個簽證雖然取消咗,但係就補返個新簽證畀傻魚,仲係同之前嗰個一樣係三年期添.嗰刻真係開心到飛起呀!不過個外人証又畀人沒收,又要去区役所整過張新o既...
喺呢個時候,瘦叔叔又走入o黎.一開口就話傻魚執到,唔使錢整個新簽證.然後又問傻魚有冇帶結婚證書,有冇任何証明傻魚真係改咗期返東京.之後又話呢啲咁o既情況傻魚仲可以試多兩次...真係畀佢激死!傻魚真係冇心,真係唔記得個再入國喺十一月中過咗期o架.跟住肥叔叔又拎張紙要傻魚填,話係上訴紙,要寫返個理由反對入管o既控訴.填完之後就出去打指模影相,完成咗個入境手續.真係當堂鬆晒~肥叔叔好好人,不斷提醒傻魚要去整個再入國,仲話畀傻魚知邊日會少啲人.傻魚係咁不斷多謝肥叔叔同其他入管職員,然後跟住瘦叔叔出返去搵個地勤姐姐拎返啲行李.
羽田空港細細,一個旅客都冇.傻魚搞咗成個鍾,凈係見到三班機到.啲人好快就走晒.海關啲哥哥仔等埋傻魚啲行李過關,然後收工小休.今次算係有驚無險,平安過渡.都可以話係出門遇貴人.不過出咗機場個人都仲係驚魂未散,唔記得係要搭免費巴士去轉電車返傻家.返到傻家仲諗住傻馬已經返咗工,點知一開門見到傻馬企喺門口笑住迎接傻魚.早知傻馬仲未返工就叫傻馬落樓抬行李上樓喇~雖然今次加埋得廿三公斤,但係都抬到傻魚死死下...
間屋比想像中好.由於搭夜機冇得瞓,加上一朝早o黎單咁刺激o既嘢,入屋見到張床即刻畀睡魔急招.傻馬返咗工之後傻魚就走入張仲暖o既被窩裡面暈迷不醒.到有返知覺嗰陣已經係下午三點幾.見到個廁所就想死,即刻開工洗廁所.洗完執埋啲行李,成個人散晒.傻馬打o黎問今晚食乜,傻魚話好攰冇力入貨所以叫傻馬買便當返o黎食算喇.點知傻馬凈係買咗傻魚嗰份,自己就整杯麵食.聽日一定要煲返煲湯至得.