美食團

今日都係自然醒,但係就早過尋日.傻馬今日有波打,清咗煲牛肉咖哩之後就走咗...之後關生關太都出街食"蟲屋",然後去做"原人"...傻魚就留守傻家執屋吸塵洗衫熨衫,然後清埋煲雞咖哩...
傻馬打到四點至返o黎,沖完個涼,飲咗碗翅湯,又差唔多夠鍾出去會合關生關太喇...今晚去東京駅附近棟新丸食嘢...太多選擇,都唔知食乜好...行咗一轉,最後決定去食寿司...

十三貫,五千幾円...

十一貫,三千幾円...

呢碟丁屎咁大o既和牛要一千八百幾円...都唔知夠填關生邊忽胃...

蜆仔味噌湯...普通...

傻魚至愛o既銀鱈魚!!!仲大塊過關生嚿牛扒...

個蟹寿司同帶子寿司太好味,所以再散嗌加單...正!!!
呢餐食咗關生一萬八千四十円...食完就喺個商場行下...經過包舖...呢間包店之前電視介紹過,啲包係不斷新鮮出爐,好正...包怪傻魚就梗係沖入去喇...

傻馬買咗呢款食...好鬆脆,好正!

傻魚就買咗呢個...中間有芝士,好味!

呢個就太甜,好似食緊練奶包咁...

呢個超正...有啲果仁同提子乾...下次經過一定會再買!!!
買完包就行返出去,傻馬話要影燈飾...某啲人一見傻馬舉機,就...

真係飽晒!!!ご馳走さま～傻魚飽到嘔緊白泡...

上年都有o黎影...

今年都一樣咁靚...不過,錯過咗聖誕啲燈飾添...

行返駅嗰陣見到呢架人力車,個司機好搞鬼...入咗閘之後,一行四人浩浩蕩蕩咁去搵超濃牛奶軟雪糕食...可惜牛奶味賣晒...失望...返到傻家切咗兩個"七龍珠"蘋果o黎食.都係"世界一"好味!!!
註:"七龍珠"蘋果係尋日喺傻家附近架生果車度買...五百円七個青森蘋果...咁啱七個嘛..."世界一"就係嗰個超大蘋果o既名.嘻~