大掃除

今日係日本天皇o既生日,所以傻馬就唔使返工.冇節目又冇街去,兩條友留喺傻家做乜好?後日關生關太會o黎日本玩,會喺傻家留宿,然後一齊去旅行.撞啱年尾有朋自遠方來,到時一定冇時間大掃除...唔通叫埋人哋一齊掃咩...所以今日食完個晏,見有多對手,就繼續之前未完o既大掃除喇...
見今日咁好太陽,即摷返張床褥出o黎曬下佢.洗晒啲地毯,枱布,換埋啲床單...移一移張枱,預個位擺多張床褥畀關生關太瞓...執完嘢,開始洗嘢...傻馬吽出o黎o既霉菌,就梗係由傻馬自己清返喇...順便叫傻馬抺埋兩個窗,然後抺埋個大門.傻魚就負責執廚房.但係個抽油煙機太高,傻魚抺唔到,就梗係叫傻馬搞掂埋佢喇.跟住就開始洗味架啲萬年油積...洗到啲皮都皺埋,仲好痛添...右手尾指仲爛埋,又痕又痛...真係弊!!!
搞完都成七點半.原本仲諗住一齊去買餸...兩條友都攰到散晒,仲邊有力出街抬大袋細袋返o黎呀...冇買餸,食乜好?!!冇有怕!!!喺傻家,就算成個星期唔去買餸,都仲搵到嘢食!左摷右摷...喺雪櫃摷到半個洋蔥同半個紅蘿蔔,再喺冰格摷包急凍蜆...

加埋櫃底包粉,整咗個韓式燒餅.煎第二塊嗰陣一時冇睇火,燶咗少少添...

食埋前日買o既大帶子刺身,再整熱包參雞湯...咁又一餐喇...呵呵~
聽日執埋個雪櫃,櫃頂同個衣櫃,大掃除就正式完結!!!今日望住個廚房,係咁傻笑...真係好開心呀!!!