出咗街通常都唔會咁早返傻家.走咗去"企鵝仔"巡舖.見到啲土鍋,想買好耐喇...今晚食鍋,好唔好買呢?買八號(三人用)好定九號(四至五人)好呢?買黑色定白色好呢?喺同一個位,不斷拎下呢個土鍋又搞下嗰個土鍋...冇一個鍾都肯定有九個字,黐咗喺同一個位置玩土鍋...幾度想放棄唔買,但最終都係決定買個九號黑色土鍋.
驅車返傻家途中經過一間擺咗好多生果喺門口o既超市.今日多咗一堆青森產黃皮大蘋果,賣一百円一個.即刻急停車返轉頭揀咗三個入去畀錢.好開心呀!返到傻家好攰,抖抖先.今晚凈係切晒啲材料擺入鍋就搞掂,諗住好簡單唔使咁早整.點知...
打開新土鍋個盒諗住拎出o黎洗完用,但係就見到有張紙仔話個新土鍋要用洗米水或兩大匙小麥粉開o既水倒八成滿,中火煲滾,然後等啲水凍咗之後倒咗去,風乾之後至可以用.咁即係今晚用唔到喇...都係整咗先,費時下次要用嗰陣又用唔到.今晚個豆乳鍋,唯有用返個易潔煲囉...
食到尾至記得影...都幾好味,不過呢個豆乳鍋湯包唔係咁有大豆味...唔知可唔可以就咁買盒無糖豆乳o黎整呢?不過傻魚唔係好識調味,都係買現成o既算喇.下次買另一個牌子試下先.
沒有留言:
發佈留言