發霉屋

返傻家前千叮萬囑叫傻馬洗定個廚房,廁所同執埋間屋,等傻魚返到o黎唔使做得咁辛苦.的確入到傻家嗰一刻見到間屋比想像中企理,當時好開心o架...點知瞓醒一覺見到個廁所...諗住算喇...係咁上下o架喇...算好o架喇...所以都冇講啲乜...但係今朝起身拉開塊窗簾諗住抺乾啲水.點知,一睇...差啲暈低~另一層白紗窗簾腳發咗霉!!!再睇真啲...連個玻璃門框啲膠都發埋霉!!!搞乜呀!!!再睇睇塊窗簾,好在冇事...搞完一輪,抺完個窗,但係啲膠上o既霉菌都仲好頑強死唔肯走...冇計,唯有等傻馬放假嗰陣叫傻馬去清.拆咗塊白紗去洗,都係洗唔清啲勁頑強霉菌.只有放棄,買過塊新o既算喇...
當然唔只咁少嘢發霉喇...張床擺喺個發霉玻璃門隔離,當然逃不過啲霉菌o既魔掌.床褥底有兩邊已經畀可惡o既霉菌占據.雖然只係好少,但係傻魚都係決定喺明年買過張新床褥.跟住傻馬話畀傻魚知,有個枕頭連埋個套發咗霉!!!點解會咁o架?!!只有一個做法,就係掟出街冇眼屎乾淨盲!吸完塵,輪到執廚房.傻馬都算醒目,知傻魚好注重個廚房o既清潔,個廚房唔使點清都好乾淨.不過...雪櫃腳邊有少少霉菌,個窗框都發埋霉,連個門口右下角都有霉菌!
係咪傻魚要求高,有潔癖呢?真係頂唔順...又奈何自己唔可以動手清潔,唯有死忍多幾日到周末等傻馬去處理.洗完個廚房,執埋個雪櫃就起程去入貨.先驅車去"企鵝仔"買白窗紗同日用品,然後去超市瘋狂入貨.返到傻家即刻掛起塊新白紗窗簾.煲落煲湯之後終於有得抖下.算係完成咗一半o既大掃除工程.跟住o黎緊幾日就係不停開洗衣機洗洗洗...希望o黎緊幾日都唔會落雨喇...

冇乜心機整晚餐,求其煮一煮算喇...哎~一陣仲要洗埋個浴室...