食飽就漫步去新宿...啲風大到個頭"癲"晒,仲差啲畀風吹走...唔係講笑...輕啲o既話真係吹得走...今日好凍,但係傻魚附近就有團"火"...關生關太一路不停係咁打情駡娋,傻魚就一路係咁嘔白泡...先去東口睇玩具,跟住去西口睇電器,然後去南口買雜物...跟住傻魚突然醒起要買飛去旅行,即口多多叫停關生摷返張"東日本七天任搭劵"畀傻魚...咁就出事喇...
關生話喺關太度,關太就話畀咗關生自己度一定冇...講講下,摷摷下,關生發皮四,話冇心機再行或食嘢,要即刻返傻家摷下喺唔喺啲行李度...傻魚一馬當先帶路去搭電車,關生關太殿後...行行下見關生行咗埋傻魚身邊,而關太就跟喺後面...咦?!!乜唔係拖住行o既咩?搞乜呀?同關生傾傾下,關生開始着火,越講越嬲...而關太就越行越慢...返到傻家,關太走入廁所喊...噢...大鑊...好在喺啲行李度搵到嗰兩張嘢啫...如果唔係後果就不堪設想...
關生嬲乜?其實係嬲關太乜都賴晒關生,乜都係關太啱晒...但係對於傻魚o黎講,呢件事就同教仔一樣,係唔可以喺條街度鬧...要鬧就返屋企關埋門,拆埋骨都冇問題...不過呢啲係關生關太兩口子o既事,傻魚咪若無其事咁囉...
搵返就梗係再去宿買飛喇...如預期所料,係冇晒位,只可以買立席...立席都殺呀...不過三個鍾又真係幾攞命下...買完關生話好肚餓,傻魚就帶佢哋去食平靚正迴転寿司...食完行返去超市買餸,再去"牛牛"買牛肉,然後去"企鵝仔"掃零食...之後途經一百円店,又走咗入去買少少嘢,然後又途經貴超市入去買咗個大蘋果...返到傻家全人類散晒,關生仲要開床小睡片刻添...
傻魚就梗係冇得抖喇...要開工煮飯仔...關生之前一句好鍾意食飯,所以傻魚就煲咗好多白飯...今晚整咗關生o既至愛...
關太碟正常普通牛肉咖哩...
關生就話要走菜多汁...所以就搞成咁...
冇晒深碟,所以傻馬就要用碗食...啲飯浸晒喺下面...
傻魚唔食得牛,所以就另整多一鍋...
加咗茄子,好味道!!!
仲凈返好多咖哩同一碗飯,聽日唔知食唔食添o架...
同場加映:
睇下個蘋果幾咁巨型!!!好似假o既咁....一陣切o黎食先...呵呵~
沒有留言:
發佈留言